ഈ തട്ടിപ്പ് ഒരു പരമ്പരാഗത മണിചെയിൻ സ്കീമായാണ് പ്രവർത്തിച്ച് വന്നത്. അയർലണ്ടിൽ, പോൺസി സ്കീമുകളും മണി ചെയിൻ സ്കീമുകളും (സാധാരണയായി പിരമിഡ് സ്കീമുകൾ എന്നറിയപ്പെടുന്നവ) കർശനമായി നിയമവിരുദ്ധമാണ്. ഈ തട്ടിപ്പ് പ്രവർത്തനങ്ങൾ ഉയർന്ന ലാഭം വാഗ്ദാനം ചെയ്ത് വ്യക്തികളെ ആകർഷിക്കുന്നു, എന്നാൽ നിയമാനുസൃതമായ ലാഭം സൃഷ്ടിക്കുന്നതിനുപകരം പുതിയ പങ്കാളികളിൽ നിന്നുള്ള ഫണ്ടുകളെ ആശ്രയിച്ചാണ് മുൻകാല നിക്ഷേപകർക്ക് പണം നൽകുന്നത്. 2007-ലെ ഉപഭോക്തൃ സംരക്ഷണ നിയമത്തിന്റെ സെക്ഷൻ 65 പ്രകാരം, ഒരു പിരമിഡ് സ്കീം സ്ഥാപിക്കുക, പ്രവർത്തിപ്പിക്കുക, പ്രോത്സാഹിപ്പിക്കുക, അല്ലെങ്കിൽ അറിഞ്ഞുകൊണ്ട് പങ്കെടുക്കുക എന്നിവ നിരോധിച്ചിരിക്കുന്നു,  ഇത് ലംഘിക്കുന്നവർക്ക്  150,000 യൂറോ വരെ പിഴയും അഞ്ച് വർഷം വരെ തടവും ലഭിക്കാം. പോൺസി സ്കീമുകൾ ഈ നിയമത്തിൽ വ്യക്തമായി പരാമർശിക്കപ്പെട്ടിട്ടില്ലെങ്കിലും, അവ കരുതിക്കൂട്ടിയുള്ള  തട്ടിപ്പ്, നിക്ഷേപ തട്ടിപ്പ് എന്നീ  നിയമങ്ങൾക്ക് കീഴിൽ ആണ്  വരുന്നത്

ഇത് ഒരു തട്ടിപ്പാണ് എന്ന് അറിയാതെ ചേർന്ന പലരും ഇന്ന് ആകുലധയിൽ ആണ്, ഇവർക്ക് എതിരെ എന്തെങ്കിലും കേസ് വരുമോ എന്ന് പലരും സംശയിക്കുന്നു. ചേർന്ന പണവും പോയി ഇനി ഇതിനു പിന്നാലെ കേസുകൂടി താങ്ങില്ല എന്ന് പേര് വെളിപ്പെടുത്താൻ ആഗ്രഹിക്കാത്ത ഒരു ഇര  വ്യക്തമാക്കി. എന്നെ ചേർക്കാൻ ആയി മൂന്നു തവണ വീട്ടിൽ വന്നു, ഇപ്പോൾ പണം ഇല്ല എന്ന് പറഞ്ഞപ്പോൾ പകുതി കൊടുത്താൽ മതി പകുതി താൻ ഇട്ടോളാം എന്ന് ചേർക്കാൻ വന്ന വ്യക്തി പറഞ്ഞു എന്നും, എന്തോ ഭാഗ്യത്തിന് ആണ് ചേരാതെ ഇരുന്നത് എന്നും മറ്റൊരു വ്യക്‌തി പറഞ്ഞു.

ആദ്യകാല നിക്ഷേപകർക്ക് ചെറിയ ലാഭം കിട്ടിയിരുന്നു എങ്കിലും അത് യഥാർത്ഥ വരുമാനത്തിൽ നിന്നല്ല, പുതിയ നിക്ഷേപകരുടെ പണത്തിൽ നിന്നായിരുന്നു. എന്നാൽ, പുതിയ ആളുകളെ കിട്ടാതെ വന്നപ്പോൾ ഈ മണിചെയിൻ തകർന്നു. തന്റെ ഞെട്ടിക്കുന്ന അനുഭവം പങ്കുവെച്ച ആ അജ്ഞാത വ്യക്തി പറഞ്ഞു: “ഞാൻ ഒരാളെ നേരിട്ട് കണ്ടു, അവൻ എന്നെ ബോധ്യപ്പെടുത്തി—ഇത് ഉറപ്പുള്ള നിക്ഷേപമാണ്, വലിയ ലാഭം കിട്ടും, ഒരു റിസ്കുമില്ല.” 7,000 യൂറോ നൽകിയ ശേഷം, കുറെ കാലം  ലാഭത്തിനായി കാത്തിരുന്നു, പക്ഷേ ഒന്നും കിട്ടിയില്ല. തന്മൂലം താൻ “വഞ്ചിക്കപ്പെട്ടു” എന്ന് അവന് മനസ്സിലായി. സ്ലൈഗോയ്ക്ക് പുറമെ ലീട്രിം, ഡോണഗൽ തുടങ്ങിയ സമീപ കൗണ്ടികളിലും ഈ തട്ടിപ്പ് പല  കുടുംബങ്ങളെയും വ്യക്തികളെയും കെണിയിലാക്കിയിട്ടുണ്ട്.

മൊത്തം നഷ്ടം ആയിരക്കണക്കിന് യൂറോയാണെന്ന് ഉറപ്പാണ്, എങ്കിലും കൃത്യമായ തുക വ്യക്തമല്ല. വാട്ട്‌സ്ആപ്പ് ഗ്രൂപ്പുകളും ജോലിസ്ഥല ബന്ധങ്ങളും, സുഹൃത്ത് ബന്ധങ്ങളും  വഴി ആളുകളെ ആകർഷിച്ചാണ് ഈ തട്ടിപ്പ് വ്യാപിച്ചത്. ഗാർഡാ അന്വേഷണം ആരംഭിച്ചെങ്കിലും, ഫെബ്രുവരി 27 വരെ ആരെയും അറസ്റ്റ് ചെയ്തിട്ടില്ല എന്നാണ് ഇപ്പോൾ അറിയാൻ കഴിയുന്നത്, തട്ടിപ്പുകാരന്റെ ഐഡന്റിറ്റി രഹസ്യമായി തന്നെ തുടരുന്നു.

അയർലൻഡിലെ മലയാളികൾക്ക് ഈ തട്ടിപ്പ് കനത്ത ആഘാതമാണ്. ഡബ്ലിനോ കോർക്കിനോ അത്ര വലുതല്ലെങ്കിലും, സ്ലൈഗോയിലെ  മലയാളി കൂട്ടായ്മ ശക്തമാണ്,  പ്രത്യേകിച്ച് ആരോഗ്യമേഖലയിൽ ജോലി ചേന്നവർ. ഇതിൽ പലരെയും ഈ മണിചെയിനിൽ ചേർക്കാൻ ബന്ധപ്പെട്ടിരുന്നു എന്നും പറയപ്പെടുന്നു.    പലർക്കും  നഷ്ടപ്പെട്ട 7,000 യൂറോ എന്നത് അയർലൻഡിന്റെ ശരാശരി വാർഷിക വരുമാനത്തിന്റെ നാലിലൊന്നാണ്—മലയാളികൾക്ക് ഇത് വലിയ തുകയാണ്, കാരണം പലരും  ജീവിതച്ചെലവിനൊപ്പം കേരളത്തിലേക്ക് പണം അയക്കുകയും നാട്ടിലെ മാതാപിതാക്കളെ സംരക്ഷിക്കുകയും ചെയ്യുന്നവർ ആണ്.

ഗാർഡ ഇരകളോട് നഷ്ടം റിപ്പോർട്ട് ചെയ്യാൻ ആവശ്യപ്പെട്ടിട്ടുണ്ട്. അന്വേഷണം ആരംഭഘട്ടത്തിലാണ്, ഇരകളുടെ എണ്ണമോ മൊത്തം നഷ്ടമോ ഔദ്യോഗികമായി വെളിപ്പെടുത്തിയിട്ടില്ല, പക്ഷേ കൗണ്ടികൾക്കപ്പുറം തട്ടിപ്പ് വ്യാപിച്ചതായി സൂചനയുണ്ട്.

Read more from here: മണിചെയിൻ തട്ടിപ്പ് ,നിരവധി മലയാളികൾക്ക് പണം നഷ്ടപ്പെട്ടതായി സൂചന