അയർലൻഡിലെ ലിമെറിക്-ക്ലയർ മേഖലയിൽ 17 വയസ്സുകാരനായ ബ്രയാൻ ലോവിന്റെ ദാരുണമായ മരണം കൊലപാതകമെന്ന് സ്ഥിരീകരിച്ച് അന്വേഷണം ശക്തമാക്കി ഗാർഡ. സെന്റ് മഞ്ചിൻസ് കോളജിലെ വിദ്യാർത്ഥിയായ ബ്രയാൻ കഴിഞ്ഞ വെള്ളിയാഴ്ചയാണ് ഇലക്ട്രിക് ബൈക്കിൽ സഞ്ചരിക്കവെ വാഹനം ഇടിച്ചു മരിച്ചത്. സംഭവത്തിൽ കൗമാരക്കാരുൾപ്പെടെയുള്ള ഒരു സംഘം സംശയാസ്പദമായ സാഹചര്യത്തിൽ നിരീക്ഷണത്തിലാണെന്ന് അധികൃതർ വ്യക്തമാക്കി. ക്ലോൺലാര ഗ്രാമത്തിന് സമീപം വെച്ചാണ് ബ്രയാൻ അപകടത്തിൽപ്പെട്ടത്.

താൻ പിന്തുടരപ്പെടുകയാണെന്ന് ബ്രയാൻ മരണത്തിന് തൊട്ടുമുമ്പുള്ള മിനിറ്റുകളിൽ തന്റെ സുഹൃത്തിന് സന്ദേശം അയച്ചിരുന്നതായി അന്വേഷണ സംഘം കണ്ടെത്തിയിട്ടുണ്ട്. ഇലക്ട്രിക് ബൈക്ക് തട്ടിയെടുക്കുക എന്ന ലക്ഷ്യത്തോടെയാണ് പ്രതികൾ ബ്രയാനെ പിന്തുടർന്നതെന്നാണ് പൊലീസിന്റെ പ്രാഥമിക നിഗമനം. മനപ്പൂർവ്വം വാഹനം ഇടിപ്പിക്കുകയായിരുന്നുവെന്നും ഇത് ആസൂത്രിതമായ കൊലപാതകമാണെന്നും ഗാർഡ സ്ഥിരീകരിക്കുന്നു.

സംഭവവുമായി ബന്ധപ്പെട്ട് ലിമെറിക്-ക്ലയർ പ്രദേശങ്ങളിലെ നിരവധി കേന്ദ്രങ്ങളിൽ പരിശോധനകൾ നടത്തിയെങ്കിലും ഇതുവരെ ആരെയും അറസ്റ്റ് ചെയ്തിട്ടില്ല. കൊലപാതകം നടന്ന സമയത്ത് കാസിൽകോണൽ, ക്ലോൺലാര മേഖലകളിൽ കണ്ട 05-C-5982 എന്ന രജിസ്ട്രേഷൻ നമ്പറിലുള്ള സിൽവർ/ഗോൾഡ് നിറത്തിലുള്ള സ്കോഡ ഒക്ടാവിയ കാറിനെ ചുറ്റിപ്പറ്റിയാണ് അന്വേഷണം പുരോഗമിക്കുന്നത്. പ്രദേശത്തെ ഒരു ക്രിമിനൽ സംഘവുമായി ബന്ധമുള്ളതും പിന്നീട് കത്തിനശിച്ച നിലയിൽ കണ്ടെത്തിയതുമായ വാഹനമാണിതെന്ന് സംശയിക്കുന്നു. എന്നാൽ, വാഹനം ഇടിക്കുന്ന സമയത്ത് ഉടമയല്ല വാഹനമോടിച്ചതെന്ന് കരുതുന്നതായി ഉദ്യോഗസ്ഥർ പറഞ്ഞു. ഡ്രൈവർക്ക് ബ്രയാനെ മുൻപരിചയമുണ്ടായിരുന്നുവെന്ന സംശയവും അന്വേഷണ സംഘം പരിശോധിക്കുന്നുണ്ട്.

ബ്രയാന്റെ വിയോഗം സെന്റ് മഞ്ചിൻസ് കോളജിലെ വിദ്യാർത്ഥികളെയും അധ്യാപകരെയും കടുത്ത മനോവിഷമത്തിലാക്കിയിരിക്കുകയാണ്. തികഞ്ഞ മാന്യനും നല്ല മനസ്സിനുടമയുമായിരുന്നു ബ്രയാനെന്ന് ഡെപ്യൂട്ടി പ്രിൻസിപ്പൽ ലോറെയ്ൻ ഷീൽസ് അനുസ്മരിച്ചു.

അന്വേഷണവുമായി ബന്ധപ്പെട്ട് എന്തെങ്കിലും വിവരങ്ങളോ ദൃശ്യങ്ങളോ ലഭിച്ചിട്ടുള്ളവർ ഹെൻട്രി സ്ട്രീറ്റ് ഗാർഡ സ്റ്റേഷനുമായോ (061-212400) ഗാർഡ കോൺഫിഡൻഷ്യൽ ലൈനുമായോ (1800-666111) ബന്ധപ്പെടണമെന്ന് ഉദ്യോഗസ്ഥർ പൊതുജനങ്ങളോട് അഭ്യർത്ഥിച്ചു. ഒരു കൗമാരക്കാരന്റെ ജീവൻ അപഹരിച്ച ഈ ക്രൂരകൃത്യത്തിന് പിന്നിലുള്ളവരെ നിയമത്തിന് മുന്നിൽ കൊണ്ടുവരാൻ വിപുലമായ അന്വേഷണമാണ് നടന്നു വരുന്നത്.