ലോകപ്രശസ്ത ഫർണിച്ചർ നിർമ്മാതാക്കളായ ഐകിയ (IKEA) ഇപ്പോൾ തങ്ങളുടെ ഉപഭോക്താക്കൾക്കായി ഒരു പുതിയ സെക്കൻഡ് ഹാൻഡ് പ്ലാറ്റ്‌ഫോം അവതരിപ്പിച്ചിരിക്കുകയാണ്. പഴയ ഫർണിച്ചറുകൾ ഉപഭോക്താക്കൾക്ക് നേരിട്ട് വിൽക്കാനും വാങ്ങാനും കഴിയുന്ന ഈ ‘പിയർ-ടു-പിയർ’ മാർക്കറ്റ് പ്ലേസ് (peer-to-peer marketplace) ഐറിഷ്, യുകെ വിപണികളിലാണ് ഇപ്പോൾ ആരംഭിച്ചിരിക്കുന്നത്. പുതിയ ഫർണിച്ചറുകൾ വാങ്ങാൻ ആഗ്രഹിക്കുന്നവർക്കും, ഉപയോഗിച്ച സാധനങ്ങൾ വിറ്റ് കാശാക്കാൻ നോക്കുന്നവർക്കും ഒരുപോലെ സന്തോഷം നൽകുന്ന വാർത്തയാണിത്.

എന്താണ് ഐകിയയുടെ പുതിയ പ്ലാറ്റ്‌ഫോം?

ഉപഭോക്താക്കൾക്ക് തങ്ങളുടെ പഴയ ഐകിയ ഫർണിച്ചറുകൾ മറ്റുള്ളവർക്ക് വിൽക്കാൻ സൗകര്യമൊരുക്കുന്നതാണ് ഈ പ്ലാറ്റ്‌ഫോം. ഐകിയ ഫാമിലി അംഗങ്ങൾക്ക് (IKEA Family members) ഇതിൽ സൗജന്യമായി ഉൽപ്പന്നങ്ങളുടെ പരസ്യം നൽകാം. ഫർണിച്ചറുകൾ വാങ്ങാൻ ആഗ്രഹിക്കുന്നവർക്ക് ഈ പ്ലാറ്റ്‌ഫോമിലൂടെ വിൽപ്പനക്കാരുമായി ബന്ധപ്പെടാനും നേരിട്ട് വാങ്ങാനും സാധിക്കും. ഐകിയ ഇതിൽ നേരിട്ട് ഇടപെടുകയില്ല എന്നതാണ് പ്രത്യേകത.

പുതിയ സാധനങ്ങളേക്കാൾ 60% വരെ വിലക്കുറവ്!

ഈ പ്ലാറ്റ്‌ഫോമിലെ ഏറ്റവും വലിയ ആകർഷണം വിലക്കുറവാണ്. ഈ മാർക്കറ്റ് പ്ലേസിലൂടെ വാങ്ങുന്ന ഉപയോഗിച്ച ഫർണിച്ചറുകൾക്ക് പുതിയ ഐകിയ ഉൽപ്പന്നങ്ങളേക്കാൾ ശരാശരി 60% വരെ വിലക്കുറവുണ്ടാകും. വിലക്കയറ്റത്തിന്റെ ഈ കാലത്ത് കുറഞ്ഞ ചെലവിൽ വീട് മോടിപിടിപ്പിക്കാൻ ആഗ്രഹിക്കുന്നവർക്ക് വളരെ ഉപകാരപ്രദമാകുന്നതാണ് ഈ സംവിധാനം.

വിൽപ്പനക്കാർക്ക് ലഭിക്കും 15% അധിക ബോണസ്!

പഴയ ഫർണിച്ചർ വിൽക്കുന്നവർക്ക് തുക കൈപ്പറ്റാൻ ഐകിയ രണ്ട് ഓപ്ഷനുകൾ നൽകുന്നുണ്ട്. ഒന്നുകിൽ വാങ്ങുന്നയാളിൽ നിന്ന് നേരിട്ട് പണം (Cash) വാങ്ങാം. അല്ലാത്തപക്ഷം, ഐകിയയുടെ ഡിജിറ്റൽ റീഫണ്ട് കാർഡ് (IKEA digital refund card) സ്വീകരിക്കാം. ഈ റീഫണ്ട് കാർഡ് തിരഞ്ഞെടുക്കുന്നവർക്ക് വിറ്റ തുകയുടെ കൂടെ 15% അധിക ബോണസ് കൂടി നൽകുമെന്നതാണ് ഐകിയയുടെ കിടിലൻ ഓഫർ. ഈ റീഫണ്ട് കാർഡ് ഉപയോഗിച്ച് ഭാവിയിൽ ഐകിയയിൽ നിന്ന് മറ്റ് സാധനങ്ങൾ വാങ്ങാൻ സാധിക്കും.

എന്തുകൊണ്ട് ഈ സെക്കൻഡ് ഹാൻഡ് വിപണി?

സെക്കൻഡ് ഹാൻഡ് വിപണിയിൽ ഉപഭോക്താക്കളുടെ താല്പര്യം വർദ്ധിച്ചുവരുന്ന പശ്ചാത്തലത്തിലാണ് ഐകിയയുടെ ഈ പുതിയ പദ്ധതി. ഒരു ശരാശരി ഐറിഷ് വീട്ടിൽ ഏകദേശം 531 യൂറോ വിലവരുന്ന ഉപയോഗിക്കാത്ത ഫർണിച്ചറുകൾ വെറുതെ കിടപ്പുണ്ടെന്നാണ് ഐകിയ നടത്തിയ പഠനത്തിൽ വ്യക്തമായത്. അവിടുത്തെ 93 ശതമാനം ആളുകളും സെക്കൻഡ് ഹാൻഡ് സാധനങ്ങൾ വാങ്ങാൻ താല്പര്യപ്പെടുന്നവരാണെന്നും കണക്കുകൾ സൂചിപ്പിക്കുന്നു.

സ്പെയിൻ, നോർവെ, പോർച്ചുഗൽ, സ്വീഡൻ തുടങ്ങി എട്ട് യൂറോപ്യൻ രാജ്യങ്ങളിൽ വിജയകരമായി പരീക്ഷിച്ചതിന് ശേഷമാണ് യുകെയിലും അയർലൻഡിലും ഈ പ്ലാറ്റ്‌ഫോം ഇപ്പോൾ ലഭ്യമാക്കിയിട്ടുള്ളത്. പരിസ്ഥിതിക്ക് അനുയോജ്യമായ രീതിയിൽ ഉൽപ്പന്നങ്ങൾ കൂടുതൽ കാലം പുനരുപയോഗിക്കാൻ ജനങ്ങളെ പ്രോത്സാഹിപ്പിക്കുക എന്നതാണ് ഇതിലൂടെ കമ്പനി ലക്ഷ്യമിടുന്നത്