അയർലൻഡിന്റെ ആരോഗ്യമേഖലയിൽ ചരിത്രപരമായ മാറ്റങ്ങൾക്ക് വഴിയൊരുക്കി ഡബ്ലിനിലെ എൽം പാർക്കിൽ പുതിയ നാഷണൽ മെറ്റേണിറ്റി ഹോസ്പിറ്റൽ (NMH) നിർമിക്കുന്നതിന് സർക്കാർ ഔദ്യോഗിക അനുമതി നൽകി. സെന്റ് വിൻസെന്റ്സ് യൂണിവേഴ്സിറ്റി ഹോസ്പിറ്റൽ കാമ്പസിലാണ് അത്യാധുനിക സൗകര്യങ്ങളോടെയുള്ള പുതിയ ആശുപത്രി വരുന്നത്. വർഷങ്ങളായി നീണ്ടുനിന്ന ചർച്ചകൾക്കും ആസൂത്രണങ്ങൾക്കും ശേഷമാണ് ഈ സുപ്രധാന തീരുമാനം യാഥാർത്ഥ്യമാകുന്നത്. രാജ്യത്തെ സ്ത്രീകളുടെ ആരോഗ്യസംരക്ഷണ സംവിധാനത്തിൽ നിർണായകമായ കുതിച്ചുചാട്ടമായിരിക്കും ഈ പദ്ധതിയെന്ന് വിലയിരുത്തപ്പെടുന്നു.
നാഷണൽ ഇൻഫ്രാസ്ട്രക്ചർ ഗൈഡ്‌ലൈൻസിലെ അപ്രൂവൽ ഗേറ്റ് 3 കടന്നതോടെ, നിർമ്മാണ കരാറുകൾ അന്തിമമാക്കാൻ HSE-ക്ക് ഇപ്പോൾ സാധിക്കും. ജോൺ സിസ്ക് ആൻഡ് സൺ എന്ന കമ്പനിയെ പ്രധാന കരാറുകാരായും ഡിസൈനർ ഗ്രൂപ്പിനെ മെക്കാനിക്കൽ, ഇലക്ട്രിക്കൽ എൻജിനീയറിങ് വിഭാഗത്തിന്റെ ചുമതലക്കാരായും നിശ്ചയിച്ചിട്ടുണ്ട്. 1.861 ബില്യൺ യൂറോയാണ് ഈ ബൃഹത്തായ പദ്ധതിക്കായി വകയിരുത്തിയിരിക്കുന്നത്.
അഞ്ച് ലക്ഷത്തി നാൽപതിനായിരം ചതുരശ്ര അടി വിസ്തൃതിയിൽ ഏഴ് നിലകളിലായാണ് പുതിയ ആശുപത്രി കെട്ടിടം ഒരുങ്ങുന്നത്. 244 സിംഗിൾ ഒക്യുപെൻസി എൻ സ്യൂട്ട് മുറികൾ, 24 പ്രത്യേക ബർത്തിങ് സ്യൂട്ടുകൾ, അഞ്ച് അത്യാധുനിക ഓപ്പറേഷൻ തിയേറ്ററുകൾ എന്നിവ ഇവിടെയുണ്ടാകും. പ്രതിവർഷം 10,000 പ്രസവങ്ങൾ വരെ കൈകാര്യം ചെയ്യാൻ ശേഷിയുള്ള ഈ ആശുപത്രി, സങ്കീർണ്ണമായ കേസുകളിൽ ചികിത്സ നൽകുന്ന ദേശീയ തലത്തിലുള്ള പ്രധാന കേന്ദ്രമായി പ്രവർത്തിക്കും. സെന്റ് വിൻസെന്റ്സ് കാമ്പസിലെ മൾട്ടി-ഡിസിപ്ലിനറി സേവനങ്ങളുമായി നേരിട്ട് ബന്ധിപ്പിച്ചിരിക്കുന്നതിനാൽ രോഗികൾക്ക് മികച്ച പരിചരണം ഉറപ്പാക്കാൻ സാധിക്കും.
ഈ പദ്ധതി ആരോഗ്യമേഖലയിലെ സുപ്രധാന നാഴികക്കല്ലാണെന്ന് HSE സിഇഒ ആൻ ഓ കോണർ വ്യക്തമാക്കി. ആരോഗ്യ വകുപ്പ്, നാഷണൽ മെറ്റേണിറ്റി ഹോസ്പിറ്റൽ, സെന്റ് വിൻസെന്റ്സ് ഹെൽത്ത് കെയർ ഗ്രൂപ്പ് എന്നിവയുടെ കൂട്ടായ പ്രവർത്തനമാണ് പദ്ധതിക്ക് പിന്നിലെന്നും അധികൃതർ അറിയിച്ചു. സങ്കീർണ്ണമായ ആരോഗ്യപ്രശ്നങ്ങളുള്ള അമ്മമാർക്കും നവജാതശിശുക്കൾക്കും വിദഗ്ദ്ധ ചികിത്സ പെട്ടെന്ന് ലഭ്യമാക്കാൻ ഈ സഹകരണം സഹായിക്കുമെന്ന് ആരോഗ്യമന്ത്രി ജെന്നിഫർ കരോൾ മാക്നീൽ പറഞ്ഞു.
പദ്ധതിയുടെ സുഗമമായ നടത്തിപ്പിനായി പ്രീ-കൺസ്ട്രക്ഷൻ സർവീസസ് എഗ്രിമെന്റ് (PCSA) വഴിയാണ് കരാറുകൾ ഉറപ്പാക്കിയത്. നിർമ്മാണ പ്രവർത്തനങ്ങൾക്കുള്ള പ്രാഥമിക നടപടികൾ എൽം പാർക്കിൽ അന്തിമഘട്ടത്തിലാണ്. 2027-ന്റെ തുടക്കത്തിൽ പ്രധാന നിർമ്മാണ പ്രവർത്തനങ്ങൾ ആരംഭിക്കും. 2033-ഓടെ പദ്ധതി പൂർത്തിയാക്കി ആശുപത്രി പ്രവർത്തനസജ്ജമാക്കാനാണ് സർക്കാരിന്റെ ലക്ഷ്യം. പ്രസവചികിത്സയ്ക്ക് പുറമെ യൂറോപ്പിലെ തന്നെ ഏറ്റവും വലിയ കോൾപോസ്കോപ്പി സേവനങ്ങളിൽ ഒന്ന്, എൻഡോമെട്രിയോസിസ് ചികിത്സ, വന്ധ്യതാ ചികിത്സാ കേന്ദ്രങ്ങൾ എന്നിവയും പുതിയ ആശുപത്രിയുടെ ഭാഗമായി പ്രവർത്തിക്കും. യൂറോപ്പിലെ തന്നെ സ്ത്രീകളുടെ ആരോഗ്യസംരക്ഷണത്തിൽ അയർലൻഡിനെ മുൻനിരയിൽ എത്തിക്കാൻ ഈ പദ്ധതി സഹായിക്കുമെന്നാണ് പ്രതീക്ഷിക്കുന്നത്.