അയർലൻഡിലെ ലിമറിക്കിൽ പ്രവർത്തിക്കുന്ന ഫാസ്റ്റ് ഫുഡ് റസ്റ്റോറന്റിന് ഒരു പാകിസ്ഥാൻ സ്വദേശിയായ തൊഴിലാളിക്ക് 57,000 യൂറോയിലധികം നഷ്ടപരിഹാരം നൽകാൻ വർക്ക്പ്ലേസ് റിലേഷൻസ് കമ്മീഷൻ (WRC) ഉത്തരവിട്ടു. 2021 ഓഗസ്റ്റ് മുതൽ 2023 ഒക്ടോബർ വരെ ദിവസം 18 മണിക്കൂർ വരെ അമിത ജോലി ചെയ്തിട്ടും ദേശീയ മിനിമം വേതനം ലഭിക്കാതിരുന്ന തൊഴിലാളിയുടെ പരാതിയിലാണ് ഏപ്രിൽ 8-ന് WRC ഈ നിർണായക വിധി പുറപ്പെടുവിച്ചത്. ഈ സംഭവം, ഹോസ്പിറ്റാലിറ്റി മേഖലയിലെ പ്രവാസി തൊഴിലാളികളുടെ ചൂഷണം വെളിവാക്കുന്നതോടൊപ്പം, 40,000-ലധികം മലയാളികൾ ഉൾപ്പെടുന്ന അയർലൻഡിലെ മലയാളി സമൂഹത്തിന് ആശങ്കയും നീതിക്കുള്ള പ്രതീക്ഷയും നൽകുന്നു.
തൊഴിലാളിയുടെ ദുരനുഭവം
ലിമറിക്കിലെ ഡേവിസ് സ്ട്രീറ്റിൽ പ്രവർത്തിക്കുന്ന ഫാസ്റ്റ് ഫുഡ് റസ്റ്റോറന്റിന് പുറമെ, മറ്റൊരു കബാബ് ആൻഡ് പിസ്സ ഷോപ്പിലും ഈ തൊഴിലാളി ജോലി ചെയ്തിരുന്നു. ഒരാഴ്ചയിൽ 115 മണിക്കൂർ വരെ—അതായത് ദിവസം ഏകദേശം 18 മണിക്കൂർ—ജോലി ചെയ്തിട്ടും ശമ്പളത്തിന് പകരം താമസം, ഒരു ദിവസത്തെ ഭക്ഷണം, ഇൻഷുറൻസോടുകൂടിയ കാർ എന്നിവ മാത്രമാണ് ലഭിച്ചത്, 10 മുതൽ 50 യൂറോ വരെയുള്ള തുച്ഛമായ തുകകൾ യാചിച്ച് വാങ്ങേണ്ട ഗതികേടിലായിരുന്നു തൊഴിലാളി. കമ്പനി കുടുംബത്തിന് പാകിസ്ഥാനിൽ മാസം ശരാശരി 410 യൂറോ അയച്ചിരുന്നെങ്കിലും, അത് നിയമപരമായ വേതനത്തിന് പകരമാകില്ല.
WRC-യിൽ തൊഴിലാളി വെളിപ്പെടുത്തിയത്, തന്റെ താമസം, കുടിയേറ്റ പദവി, ജീവനോപാധി എന്നിവയ്ക്കായി തൊഴിൽദാതാവിനെ ആശ്രയിക്കേണ്ടി വന്നതിനാൽ താൻ കെണിയിൽപ്പെട്ടതായി തോന്നിയെന്നാണ്. പാകിസ്ഥാനിലെ പോലീസിനും രാഷ്ട്രീയക്കാർക്കും തന്റെ തൊഴിൽദാതാവിന് ബന്ധമുണ്ടെന്ന് ആരോപിച്ച്, തന്റെയും കുടുംബത്തിന്റെയും സുരക്ഷയെക്കുറിച്ച് ഭയപ്പെട്ടിരുന്നതായും അദ്ദേഹം വ്യക്തമാക്കി. 2023-ൽ രോഗിയായ പിതാവിനെ കാണാനും വിവാഹനിശ്ചയത്തിനും പാകിസ്ഥാനിലേക്ക് പോയപ്പോൾ, ശമ്പളത്തിനായി നിരന്തരം ആവശ്യപ്പെട്ടതിന് ശേഷം മാത്രമാണ് ആണ് കുടിശിക കുറച്ചേനങ്ങിലും ലഭിച്ചത്.
WRC വിധി
നാഷണൽ മിനിമം വേതന നിയമം 2000 പ്രകാരം (അക്കാലത്ത് മണിക്കൂറിന് 10.20-11.30 യൂറോ) തൊഴിലാളിക്ക് അർഹമായ വേതനം നൽകുന്നതിൽ കമ്പനി പരാജയപ്പെട്ടതായി WRC അഡ്ജുഡിക്കേഷൻ ഓഫീസർ ഊന ഗ്ലേസിയർ-ഫാർമർ കണ്ടെത്തി. മൈഗ്രന്റ് റൈറ്റ്സ് സെന്റർ അയർലൻഡ് (MRCI) പ്രതിനിധീകരിച്ച തൊഴിലാളിയുടെ ദുർബലത കണക്കിലെടുത്ത് പേര് രഹസ്യമാക്കി വയ്ക്കാൻ ആവശ്യപ്പെട്ടു. കമ്പനി പ്രതിനിധികൾ വിചാരണയിൽ ഹാജരാകാത്തതിനാൽ, തൊഴിലാളിയുടെ മൊഴി മാത്രം അടിസ്ഥാനമാക്കിയാണ് 57,000 യൂറോയിലധികം നഷ്ടപരിഹാരം നൽകാൻ ഉത്തരവിട്ടത്.
വിശാലമായ പ്രത്യാഘാതങ്ങൾ
അയർലൻഡിന്റെ ഹോസ്പിറ്റാലിറ്റി മേഖലയിലെ തൊഴിൽ ചൂഷണം വർധിക്കുന്നതിനിടെ, 2023-ൽ ഡബ്ലിനിലെ ഒരു റസ്റ്റോറന്റിനെതിരെ WRC സമാന വിധി പുറപ്പെടുവിച്ചിരുന്നതായി കാണാം. നാഷണൽ മിനിമം വേതന നിയമം നടപ്പാക്കുന്നതിൽ വെല്ലുവിളികൾ നേരിടുന്നുണ്ട്—വിശേഷിച്ച് വർക്ക് പെർമിറ്റിൽ എത്തുന്നവർക്ക് തൊഴിൽദാതാക്കളെ മാറ്റാനാകാത്തത് ചൂഷണത്തിന് വഴിയൊരുക്കുന്നു എന്ന് MRCI വിമർശിക്കുന്നു.