ഡബ്ലിൻ: ഡബ്ലിനിൽ ഇന്ത്യൻ വംശജനായ ഡോക്ടർക്ക് നേരെ ജൂലൈ 28, 2025-ന് വൈകുന്നേരം ക്രൂരമായ വംശീയ ആക്രമണം. തന്റെ അപ്പാർട്ട്മെന്റിന് സമീപം നടന്ന ഈ അതിക്രമത്തെക്കുറിച്ച് അദ്ദേഹം ലിങ്ക്ഡ്ഇനിൽ വിശദീകരിച്ചു.

വൈകുന്നേരം ഭക്ഷണം കഴിഞ്ഞ് അപ്പാർട്ട്മെന്റിന് സമീപം നടക്കുകയായിരുന്ന അദ്ദേഹത്തെ ആറ് കൗമാരക്കാർ പിന്നിൽ നിന്ന് ആക്രമിക്കുകയായിരുന്നു. അവർ അദ്ദേഹത്തിന്റെ കണ്ണട തകർക്കുകയും തല, മുഖം, കഴുത്ത്, നെഞ്ച്, കൈകൾ, കാലുകൾ എന്നിവിടങ്ങളിൽ അനിയന്ത്രിതമായി മർദിക്കുകയും ചെയ്തു. രക്തം വാർന്ന് നടപ്പാതയിൽ വീണ അദ്ദേഹം ഗാർഡയെ  വിളിച്ചതിനെ തുടർന്ന് ഗാർഡ ആംബുലൻസിൽ ബ്ലാഞ്ചാർഡ്സ്ടൗൺ ആശുപത്രിയിൽ എത്തിച്ചു. മെഡിക്കൽ പരിശോധനയിൽ അദ്ദേഹത്തിന്റെ കവിൾ എല്ലിന് പൊട്ടൽ സ്ഥിരീകരിച്ചു. നിലവിൽ അദ്ദേഹം സ്പെഷ്യലിസ്റ്റ് ചികിത്സയ്ക്കായി റഫർ ചെയ്യപ്പെട്ടിരിക്കുകയാണ്.

ഈ  അനുഭവം ഒറ്റപ്പെട്ട സംഭവമല്ലെന്നും ഡബ്ലിനിലെ ബസ്സുകളിലും, ഹൗസിങ് എസ്റ്റേറ്റുകളിലും, പൊതു ഇടങ്ങളിലും ഇന്ത്യൻ പുരുഷന്മാർക്കും മറ്റ് ന്യൂനപക്ഷങ്ങൾക്കും നേരെ വംശീയ ആക്രമണങ്ങൾ വർധിച്ചുവരികയാണെന്നും അദ്ദേഹം തന്റെ പോസ്റ്റിൽ ചൂണ്ടിക്കാട്ടി. “ഈ ആക്രമണകാരികൾ ശിക്ഷിക്കപ്പെടാതെ സ്വതന്ത്രരായി നടക്കുന്നു, ഇത് അവരെ വീണ്ടും ആക്രമിക്കാൻ പ്രോത്സാഹിപ്പിക്കുന്നു,” അദ്ദേഹം കുറ്റപ്പെടുത്തി.

അയർലണ്ട് ഗവൺമെന്റ്, ഡബ്ലിനിലെ ഇന്ത്യൻ എംബസി, ഇന്ത്യയുടെ വിദേശകാര്യ മന്ത്രാലയം, ഇന്ത്യൻ അംബാസഡർ അഖിലേഷ് മിശ്ര എന്നിവരോട് സുരക്ഷ ഉറപ്പാക്കാൻ കർശന നടപടികൾ സ്വീകരിക്കണമെന്ന് ഡോക്ടർ തന്റെ പോസ്റ്റിൽ അഭ്യർത്ഥിച്ചു. “ഞങ്ങൾക്ക് സുരക്ഷിതമായി ജീവിക്കാൻ അവകാശമുണ്ട്. തെരുവുകളിൽ ഭയമില്ലാതെ നടക്കാൻ ഞങ്ങൾക്ക് അർഹതയുണ്ട്,” അദ്ദേഹം കുറിച്ചു.

ഇതുവരെ അറസ്റ്റുകളൊന്നും നടന്നിട്ടില്ല. ഈ ആക്രമണം ലിങ്ക്ഡ്ഇനിൽ വ്യാപകമായി ചർച്ച ചെയ്യപ്പെട്ടു, പലരും  അദ്ദേഹത്തോട് പെട്ടന്ന് സുഖം പ്രാപിക്കട്ടെ എന്ന് ആശംസിക്കുകയും അന്വേഷണത്തിന്റെ പുരോഗതിയെക്കുറിച്ച് ചോദ്യങ്ങൾ ഉന്നയിക്കുകയും ചെയ്തു.

ഈ സംഭവം ഡബ്ലിനിലെ വർധിച്ചുവരുന്ന വംശീയ ആക്രമണങ്ങളെക്കുറിച്ചുള്ള ആശങ്കകൾ വീണ്ടും ഉയർത്തിയിട്ടുണ്ട്. കൂടുതൽ വിവരങ്ങൾ നൽകാനായി ബ്ലാഞ്ചാർഡ്സ്ടൗൺ ഗാർഡ സ്റ്റേഷനിൽ (01 666 7000), ഗാർഡ കോൺഫിഡൻഷ്യൽ ലൈനിൽ (1800 666 111) അല്ലെങ്കിൽ ഏതെങ്കിലും ഗാർഡ സ്റ്റേഷനിൽ ബന്ധപ്പെടാവുന്നതാണ്.

ഐർലൻഡ് മലയാളി 
ഐർലൻഡ് മലയാളി വാര്‍ത്തകൾ നേരത്തെ ലഭിക്കുവാന്‍ താഴെയുള്ള ലിങ്ക്  ക്ലിക്ക് ചെയ്ത് ഞങ്ങളുടെ വാട്‌സാപ്പിൽ ജോയിന്‍ ചെയ്യൂ  https://whatsapp.com/channel/0029Vb5x7AqFcow9HXewaZ0s  വാട്‌സാപ്പ് ഗ്രൂപ്പ് https://chat.whatsapp.com/IiAT1fRaSJOJXHh7DSMJnY?  Facebook: https://www.facebook.com/irelandmalayali