ബാംഗൂർ: ക്യാൻസർ ബാധിതരായ കുട്ടികൾക്കും അവരുടെ കുടുംബങ്ങൾക്കും ആശ്വാസമേകാൻ കൈകോർത്ത് മലയാളി സമൂഹം. ‘ക്യാൻസർ ഫണ്ട് ഫോർ ചിൽഡ്രൻ’ (Cancer Fund for Children) എന്ന സംഘടനയ്ക്ക് വേണ്ടി ധനസമാഹരണം നടത്തുന്നതിനായി ബാംഗൂർ മലയാളി ക്രിക്കറ്റ് ടീമിൻ്റെ (BMCT) നേതൃത്വത്തിൽ വിപുലമായ ചാരിറ്റി കോൺസേർട്ട് സംഘടിപ്പിക്കുന്നു.

ഈ വരുന്ന മാർച്ച് 14-ന് ന്യൂടൗൺാർഡ്സിലെ ക്വീൻസ് ഹാളിൽ (Queens Hall, Newtownards) വൈകുന്നേരം 5:30 മുതൽ 9:30 വരെയാണ് ഏവരും കാത്തിരിക്കുന്ന ഈ കലാസന്ധ്യ അരങ്ങേറുന്നത്. Location: https://share.google/tkLc50HDMtGHeT84Z

അയർലണ്ടിലെ പ്രശസ്തമായ മ്യൂസിക് ബാന്റ് നയിക്കുന്ന ഗാനമേളയും, നോർത്തേൺ അയർലണ്ടിലെ മികച്ച ട്രൂപ്പുകളിലൊന്ന് അവതരിപ്പിക്കുന്ന ഐറിഷ് ഡാൻസും പരിപാടിയുടെ പ്രധാന ആകർഷണങ്ങളാണ്. കൂടാതെ, യുവ പ്രതിഭ ആദം ബിനു (Adam Binu) ഒരുക്കുന്ന വയലിൻ ഫ്യൂഷനും, വിഭവസമൃദ്ധമായ ഡിന്നറും ഈ പരിപാടിയുടെ ഭാഗമായി ഉൾപ്പെടുത്തിയിട്ടുണ്ട്.

ജീവകാരുണ്യ പ്രവർത്തനത്തിനായുള്ള ഈ ഉദ്യമത്തിന് മികച്ച പ്രതികരണമാണ് പ്രവാസി സമൂഹത്തിൽ നിന്നും ലഭിക്കുന്നത്. പരിപാടിയുടെ എൻട്രി പാസ് (Entry Pass) വിതരണോദ്ഘാടനം കഴിഞ്ഞ ദിവസം പ്രൗഢഗംഭീരമായ ചടങ്ങിൽ വെച്ച് നിർവ്വഹിക്കപ്പെട്ടു. ആദ്യഘട്ട ടിക്കറ്റ് വിൽപ്പനയ്ക്ക് വലിയ സ്വീകാര്യതയാണ് ലഭിച്ചത്.

പരിപാടിയിൽ നിന്നും ലഭിക്കുന്ന മുഴുവൻ തുകയും അന്നേ ദിവസം തന്നെ ‘ക്യാൻസർ ഫണ്ട് ഫോർ ചിൽഡ്രൻ’ അധികൃതർക്ക് കൈമാറുമെന്ന് സംഘാടകർ അറിയിച്ചു. ഒരു സമൂഹം ഒന്നാകെ ഒരു ചെറു പുഞ്ചിരിക്കായി കൈകോർക്കുമ്പോൾ, ഈ സംഗീത സായാഹ്നം വൻ വിജയമാക്കി തീർക്കാനുള്ള തയ്യാറെടുപ്പിലാണ് ബാംഗൂർ മലയാളി ക്രിക്കറ്റ് ടീമും ബാംഗൂരിലെ മലയാളി സമൂഹവും.