അയർലണ്ടിൽ പ്രതിവർഷം നൂറുകണക്കിന് പേർക്ക് ‘ലൈം ഡിസീസ്’ (Lyme disease) ബാധിക്കുന്നതായി ആരോഗ്യവിഭാഗമായ എച്ച്.എസ്.ഇ (HSE) യുടെ മുന്നറിയിപ്പ്. പ്രധാനമായും വേനൽക്കാലത്തും ശരത്കാലത്തുമാണ് (Autumn) ഈ രോഗം കൂടുതൽ പേരിലേക്ക് പടരുന്നത്. കാടുകൾ, പുൽമേടുകൾ എന്നിവിടങ്ങളിൽ കാണപ്പെടുന്ന ‘ടിക്കുകൾ’ (Ticks) അഥവാ ചെള്ള്കളിലൂടെയാണ് ഈ ബാക്ടീരിയൽ അണുബാധ മനുഷ്യരിലേക്ക് പകരുന്നത്.

എന്താണ് ലൈം ഡിസീസ്?

ബൊറെലിയ (Borrelia) എന്ന ബാക്ടീരിയ മൂലമുണ്ടാകുന്ന ഒരു അണുബാധയാണ് ലൈം ഡിസീസ്. രോഗബാധിതമായ ചെള്ള് (Ticks) കടിയേൽക്കുന്നതിലൂടെയാണ് മനുഷ്യരിലേക്ക് ഇത് പകരുന്നത്. ഹൈക്കിങ് (Hiking), ക്യാമ്പിങ് തുടങ്ങിയ വിനോദങ്ങളിൽ ഏർപ്പെടുന്നവർക്കും കാടുകളിലും പുൽമേടുകളിലും ജോലി ചെയ്യുന്നവർക്കുമാണ് ഇതിനുള്ള സാധ്യത കൂടുതലുള്ളത്. മാനുകൾ, ആടുകൾ തുടങ്ങിയ മൃഗങ്ങളുമായുള്ള സമ്പർക്കവും രോഗസാധ്യത വർദ്ധിപ്പിക്കുന്നു.

പ്രധാന ലക്ഷണങ്ങൾ:

രോഗം ബാധിച്ചവരിൽ വ്യത്യസ്തമായ ലക്ഷണങ്ങളാണ് കാണിക്കുന്നത്. ഈ രോഗത്തെ പ്രധാനമായും മൂന്ന് ഘട്ടങ്ങളായാണ് തരംതിരിച്ചിരിക്കുന്നത്:

• ആദ്യഘട്ടം (Early localised disease): ഉണ്ണിയുടെ കടിയേറ്റ ഭാഗത്ത് ചുവന്ന നിറത്തിൽ വട്ടത്തിലുള്ള പാടുകൾ (Bullseye rash – Erythema migrans) കാണപ്പെടും. പനി, പേശിവേദന, ക്ഷീണം തുടങ്ങിയവയും ഉണ്ടാകാം.

• രണ്ടാം ഘട്ടം (Early disseminated disease): ഈ ഘട്ടത്തിൽ ബാക്ടീരിയ രക്തത്തിലൂടെ ശരീരത്തിന്റെ മറ്റു ഭാഗങ്ങളിലേക്ക് പടരുന്നു. കടുത്ത പനി, മുഖത്തെ ഞരമ്പുകളുടെ തളർച്ച (Facial droop), സന്ധിവേദന, മെനിഞ്ചൈറ്റിസ് (Meningitis) തുടങ്ങിയവയാണ് ലക്ഷണങ്ങൾ.

• മൂന്നാം ഘട്ടം (Chronic disseminated disease): കൃത്യമായ ചികിത്സ ലഭിച്ചില്ലെങ്കിൽ ഇത് ശരീരത്തിലെ പല അവയവങ്ങളെയും സാരമായി ബാധിക്കുന്ന ഗുരുതരമായ അവസ്ഥയിലേക്ക് നയിച്ചേക്കാം.

പ്രതിരോധ മാർഗ്ഗങ്ങൾ:

ലൈം ഡിസീസിനെതിരെ നിലവിൽ പ്രത്യേക വാക്സിനുകൾ ലഭ്യമല്ലാത്തതിനാൽ മുൻകരുതലുകൾ എടുക്കുക എന്നതാണ് ഏറ്റവും മികച്ച പ്രതിരോധം. എച്ച്.എസ്.ഇ നൽകുന്ന നിർദ്ദേശങ്ങൾ താഴെ പറയുന്നവയാണ്:

• പുൽമേടുകളിലേക്കും കാടുകളിലേക്കും പോകുമ്പോൾ ശരീരം മുഴുവൻ മൂടുന്ന വസ്ത്രങ്ങൾ ധരിക്കുക.

• ചെള്ള്കളെ അകറ്റി നിർത്താൻ സഹായിക്കുന്ന ഇൻസെക്റ്റ് റിപ്പല്ലന്റുകൾ (Insect repellents) ഉപയോഗിക്കുക.

• ഇത്തരം സ്ഥലങ്ങളിൽ നിന്ന് മടങ്ങിയെത്തിയ ശേഷം ശരീരത്തിലോ വസ്ത്രത്തിലോ ചെള്ള്കൾ പറ്റിപ്പിടിച്ചിട്ടില്ലെന്ന് ഉറപ്പുവരുത്തുക. വളർത്തുമൃഗങ്ങളെയും കൃത്യമായി പരിശോധിക്കുക.

• ശരീരത്തിൽ ചെള്ള് കടിച്ചിട്ടുണ്ടെങ്കിൽ, പ്രത്യേക ടിക്ക് ടൂളുകൾ (Tick tools) ഉപയോഗിച്ച് ശ്രദ്ധയോടെ അവയെ നീക്കം ചെയ്യണം. ചെള്ള് ഞെക്കി കൊല്ലാൻ ശ്രമിക്കുന്നത് ബാക്ടീരിയ രക്തത്തിൽ കലരാൻ കാരണമായേക്കും.

കൃത്യമായ സമയത്ത് രോഗനിർണ്ണയം നടത്തിയാൽ ആന്റിബയോട്ടിക്കുകളിലൂടെ (Doxycycline or Amoxicillin) ലൈം ഡിസീസ് പൂർണ്ണമായും ഭേദമാക്കാൻ സാധിക്കും. ചെള്ള് കടിയേൽക്കുകയോ, ശരീരത്തിൽ വട്ടത്തിലുള്ള പാടുകൾ കാണുകയോ ചെയ്താൽ ഉടനടി ഡോക്ടറെ (GP) സമീപിച്ച് ചികിത്സ തേടേണ്ടതാണ്. രോഗം സ്ഥിരീകരിക്കുന്നതിലെ കാലതാമസം പിന്നീട് സങ്കീർണ്ണമായ ആരോഗ്യപ്രശ്നങ്ങൾക്ക് കാരണമായേക്കാം.