ഡബ്ലിൻ: ഐആർപി (Irish Residence Permit) കാർഡ് പുതുക്കാൻ നൽകി പുതിയ കാർഡിനായി കാത്തിരിക്കുന്ന അയർലൻഡിലെ പ്രവാസികൾക്ക് വലിയ ആശ്വാസമായി ഡിപ്പാർട്ട്മെന്റ് ഓഫ് ജസ്റ്റിസിന്റെ പുതിയ അറിയിപ്പ്. നിലവിലെ ഐആർപി കാർഡിന്റെ കാലാവധി കഴിഞ്ഞാലും, കാർഡ് പുതുക്കാനായി അപേക്ഷ നൽകിയിട്ടുള്ളവർക്ക് പഴയ കാർഡ് ഉപയോഗിച്ച് തന്നെ ഈ വേനൽക്കാലത്ത് അന്താരാഷ്ട്ര യാത്രകൾ നടത്താമെന്ന് ഇമിഗ്രേഷൻ അധികൃതർ വ്യക്തമാക്കി. 2026 ജൂലൈ 13 മുതൽ ആഗസ്റ്റ് 31 വരെയുള്ള കാലയളവിലാണ് ഈ താൽക്കാലിക ഇളവ് അനുവദിച്ചിരിക്കുന്നത്.
എന്താണ് പുതിയ മാറ്റം?
ഇമിഗ്രേഷൻ ഓഫീസുകളിലെ വലിയ തിരക്ക് കാരണം ഐആർപി കാർഡുകൾ പുതുക്കി ലഭിക്കാൻ നിലവിൽ 17 ആഴ്ചകളിലധികം സമയമെടുക്കുന്നുണ്ട്. ഇത് വേനൽക്കാല അവധിക്ക് നാട്ടിൽ പോകാനിരുന്ന നിരവധി പ്രവാസികളെ പ്രതിസന്ധിയിലാക്കിയിരുന്നു. ഈ പ്രതിസന്ധി ഒഴിവാക്കാനും യാത്രാതടസ്സങ്ങൾ മാറ്റാനുമാണ് മന്ത്രിയുടെ നേതൃത്വത്തിൽ പുതിയ താൽക്കാലിക സംവിധാനം ഏർപ്പെടുത്തിയിരിക്കുന്നത്. ഇതനുസരിച്ച്, ഐആർപി കാർഡ് പുതുക്കാൻ കൃത്യസമയത്ത് അപേക്ഷിച്ചവർക്ക്, അവരുടെ പഴയ കാർഡ് കാണിച്ച് യാത്ര ചെയ്യാനും തിരികെ അയർലൻഡിൽ പ്രവേശിക്കാനും സാധിക്കും.
ആർക്കൊക്കെ ഈ ഇളവ് ലഭിക്കും?
അയർലൻഡിൽ നിയമപരമായി താമസിക്കുന്നവർക്കും, നിലവിലെ ഐആർപി കാർഡിന്റെ കാലാവധി തീരുന്നതിന് മുൻപായി കാർഡ് പുതുക്കാൻ അപേക്ഷ സമർപ്പിച്ചവർക്കും മാത്രമാണ് ഈ ആനുകൂല്യം ലഭിക്കുക.
കാർഡിന്റെ കാലാവധി കഴിഞ്ഞതിന് ശേഷമാണ് പുതുക്കാൻ അപേക്ഷ നൽകിയതെങ്കിൽ ഈ നോട്ടീസ് ബാധകമല്ല. അവർക്ക് ഈ ഇളവ് ഉപയോഗിച്ച് യാത്ര ചെയ്യാൻ സാധിക്കില്ല.
സിംഗിൾ എൻട്രി വിസയും മുൻപ് ലാൻഡിങ് സ്റ്റാമ്പും ഉള്ളവർക്ക് അയർലൻഡിലേക്ക് തിരികെ വരാൻ റീ-എൻട്രി വിസ ആവശ്യമാണ്. എന്നാൽ വാലിഡായ മൾട്ടി-എൻട്രി വിസയുള്ളവർക്ക് യാത്ര ചെയ്യാൻ തടസ്സമില്ല.
യാത്ര ചെയ്യുമ്പോൾ കയ്യിൽ കരുതേണ്ട രേഖകൾ:
ഈ ഇളവ് ഉപയോഗിച്ച് യാത്ര ചെയ്യുന്നവർ എയർപോർട്ടിൽ ഇമിഗ്രേഷൻ അധികാരികളോ എയർലൈൻ പ്രതിനിധികളോ ചോദിക്കുമ്പോൾ താഴെ പറയുന്ന മൂന്ന് രേഖകൾ നിർബന്ധമായും കാണിക്കേണ്ടതുണ്ട്:
കാലാവധി കഴിഞ്ഞ ഐആർപി കാർഡ്.
കാർഡ് പുതുക്കാൻ നൽകിയതിന്റെ തെളിവ്: അപേക്ഷ സമർപ്പിച്ച തീയതിയും സവിശേഷമായ OREG നമ്പറും വ്യക്തമാക്കുന്ന ഇമെയിൽ രസീത്.
ട്രാവൽ കൺഫർമേഷൻ നോട്ടീസ് (Travel Confirmation Notice): ഈ വാർത്തയോടൊപ്പം നൽകിയിട്ടുള്ളതോ, അല്ലെങ്കിൽ ഇമിഗ്രേഷൻ വെബ്സൈറ്റിൽ (www.irishimmigration.ie) നിന്നോ ഈ നോട്ടീസ് ഡൗൺലോഡ് ചെയ്ത് പ്രിന്റ് എടുത്ത് കയ്യിൽ കരുതണം.
യാത്രക്കാർ പ്രത്യേകം ശ്രദ്ധിക്കേണ്ട കാര്യങ്ങൾ:
യാത്ര തിരിക്കുന്നതിന് മുൻപ് നിങ്ങളുടെ എയർലൈനുമായി ബന്ധപ്പെട്ട് ഈ ട്രാവൽ നോട്ടീസിനെക്കുറിച്ച് അവർക്ക് അറിവുണ്ടെന്നും അത് അവർ അംഗീകരിക്കുന്നുണ്ടെന്നും ഉറപ്പുവരുത്തുക.
മറ്റ് രാജ്യങ്ങൾ വഴി കണക്ടിങ് ഫ്ലൈറ്റുകളിൽ (Transit) യാത്ര ചെയ്യുന്നവർ, ട്രാൻസിറ്റ് ചെയ്യുന്ന രാജ്യങ്ങളിലെ ഇമിഗ്രേഷൻ നിയമപ്രകാരം ഈ ഐറിഷ് നോട്ടീസ് അവർ അംഗീകരിക്കുമോ എന്ന് ടിക്കറ്റ് ബുക്ക് ചെയ്യുന്നതിന് മുൻപ് തന്നെ അന്വേഷിക്കേണ്ടതാണ്.
വേനലവധിക്ക് നാട്ടിലേക്ക് യാത്ര തിരിക്കാൻ ഒരുങ്ങുന്ന മലയാളികൾ ഉൾപ്പെടെയുള്ള ആയിരക്കണക്കിന് പ്രവാസികൾക്ക് വലിയ ആശ്വാസമാകുന്നതാണ് അയർലൻഡ് സർക്കാരിന്റെ ഈ പുതിയ പ്രഖ്യാപനം. ആഗസ്റ്റ് 31 വരെ മാത്രമേ ഈ ആനുകൂല്യം ലഭ്യമാകൂ.