ഓഫലിയിലെ (Offaly) ടുള്ളമൂർ കോർട്ട് ഹോട്ടലിൽ വെച്ച് നടന്ന ഫിയാന ഫെയ്ൽ (Fianna Fáil) പാർട്ടിയുടെ വാർഷിക യോഗത്തിൽ സംസാരിക്കുകയായിരുന്നു അദ്ദേഹം. ഫിയാന ഫെയ്ൽ ടി.ഡി. സെയ്മസ് മക്ഗ്രാത്ത് (Séamus McGrath) ആണ് ഈ നിർദ്ദേശം പ്രധാനമായും മുന്നോട്ടുവെച്ചത്. പുതിയതോ പഴയതോ ആയ വീടുകൾ വാങ്ങുമ്പോൾ ആദ്യമായി വീട് വാങ്ങുന്നവരെ സ്റ്റാമ്പ് ഡ്യൂട്ടിയിൽ നിന്ന് പൂർണ്ണമായും ഒഴിവാക്കണമെന്നും, വിലക്കയറ്റത്തിന്റെ ഈ കാലത്ത് ഇത് അവർക്ക് വലിയ ആശ്വാസമാകുമെന്നുമാണ് സെയ്മസ് മക്ഗ്രാത്ത് ആവശ്യപ്പെട്ടത്. ഈ നിർദ്ദേശത്തെ അനുകൂലിച്ച പ്രധാനമന്ത്രി, ബജറ്റിൽ പരിഗണിക്കേണ്ട വിഷയങ്ങളുടെ പട്ടികയിൽ ഇത് ഉൾപ്പെടുത്തിയിട്ടുണ്ടെന്നും ഇതിൽ ചർച്ചകൾ നടക്കുമെന്നും വ്യക്തമാക്കി. ഭവനകാര്യ മന്ത്രി ജെയിംസ് ബ്രൗണും (James Browne) ഈ തീരുമാനത്തെ അനുകൂലിച്ച് രംഗത്തെത്തിയിട്ടുണ്ട്.

എന്നാൽ, പ്രധാനമന്ത്രിയുടെ ഈ പ്രസ്താവനയോട് ഉപപ്രധാനമന്ത്രി (Tánaiste) സൈമൺ ഹാരിസ് (Simon Harris) വിയോജിപ്പ് പ്രകടിപ്പിച്ചു. വരാനിരിക്കുന്ന ബജറ്റിൽ സ്റ്റാമ്പ് ഡ്യൂട്ടി ഒഴിവാക്കാൻ നിലവിൽ യാതൊരു പദ്ധതിയുമില്ലെന്നാണ് അദ്ദേഹം വ്യക്തമാക്കിയത്. ഒക്ടോബർ 6-ന് അവതരിപ്പിക്കുന്ന ബജറ്റിൽ, വ്യക്തിഗത ആദായ നികുതിയിൽ ഇളവുകൾ നൽകാനാണ് സർക്കാർ കൂടുതൽ മുൻഗണന നൽകുന്നതെന്നും അദ്ദേഹം കൂട്ടിച്ചേർത്തു. ഭവന നിർമ്മാണം പ്രോത്സാഹിപ്പിക്കാൻ മറ്റ് പദ്ധതികൾ ബജറ്റിലുണ്ടാകുമെന്നും അദ്ദേഹം സൂചിപ്പിച്ചു.

അയർലണ്ടിൽ ഒരു വീട് വാങ്ങുമ്പോൾ 1 മില്യൺ യൂറോ വരെയുള്ള തുകയ്ക്ക് 1 ശതമാനവും, 1 മില്യൺ മുതൽ 1.5 മില്യൺ യൂറോ വരെ 2 ശതമാനവും, അതിന് മുകളിലുള്ള തുകയ്ക്ക് 6 ശതമാനവുമാണ് നിലവിൽ സ്റ്റാമ്പ് ഡ്യൂട്ടി ഈടാക്കുന്നത്. 2010 ഡിസംബർ 8 വരെ ആദ്യമായി വീട് വാങ്ങുന്നവർക്ക് സ്റ്റാമ്പ് ഡ്യൂട്ടി ഇളവ് ഉണ്ടായിരുന്നു.

ജീവിതച്ചെലവ് ലഘൂകരിക്കുന്നതിന്റെ ഭാഗമായി മുൻ വർഷങ്ങളിൽ നൽകിയിരുന്ന ഒറ്റത്തവണ ഊർജ്ജ സബ്സിഡികൾ (Universal energy credit) ഇത്തവണത്തെ ബജറ്റിൽ ഉണ്ടാകില്ലെന്നും മീഹോൾ മാർട്ടിൻ സ്ഥിരീകരിച്ചിട്ടുണ്ട്. ഒറ്റത്തവണ പേയ്‌മെന്റുകൾക്ക് പകരം സാമൂഹിക സുരക്ഷ, ശിശു സംരക്ഷണം തുടങ്ങിയ മേഖലകളിൽ സ്ഥിരമായ മാറ്റങ്ങൾ കൊണ്ടുവരാനാണ് സർക്കാർ ലക്ഷ്യമിടുന്നത്.

ആദ്യമായി വീട് വാങ്ങുന്നവർക്ക് സ്റ്റാമ്പ് ഡ്യൂട്ടി ഇളവ് നൽകുന്നതുമായി ബന്ധപ്പെട്ട ഉപപ്രധാനമന്ത്രി സൈമൺ ഹാരിസിന്റെ നിലപാട് ഈ വീഡിയോയിൽ വ്യക്തമാക്കുന്നുണ്ട്.