ഡബ്ലിൻ: അയർലൻഡിൽ ഇന്ന് (ഒക്ടോബർ 5, തിങ്കൾ) ടയർ സുരക്ഷാ ദിനമായി (Tyre Safety Day) ആചരിക്കുന്നു.ഈ വാരം രാജ്യത്ത് റോഡ് സുരക്ഷാ വാരമായി (Road Safety Week) ആചരിക്കുന്നതിന്റെ ഭാഗമായാണ് വാഹനങ്ങളുടെ ടയർ സുരക്ഷയ്ക്കായി ഒരു പ്രത്യേക ദിനം മാറ്റിവെച്ചിരിക്കുന്നത്. ഇതിന്റെ ഭാഗമായി ഈ ആഴ്ച നിരത്തുകളിൽ ഗാർഡയുടെയും റോഡ് സേഫ്റ്റി അതോറിറ്റിയുടെയും (RSA) കർശന വാഹന പരിശോധനയുണ്ടാകും.

തേയ്മാനം സംഭവിച്ചതോ സുരക്ഷിതമല്ലാത്തതോ ആയ ടയറുകളുമായി നിരത്തിലിറങ്ങുന്ന ഡ്രൈവർമാർക്ക് കർശന മുന്നറിയിപ്പാണ് അധികൃതർ നൽകുന്നത്. പരിശോധനയിൽ ടയറുകൾക്ക് തകരാറുണ്ടെന്നോ തേയ്മാനം സംഭവിച്ചെന്നോ കണ്ടെത്തിയാൽ ഡ്രൈവർക്ക് 80 യൂറോ പിഴയും 2 പെനാൽറ്റി പോയിന്റും ലഭിക്കും. നിശ്ചിത സമയത്തിനുള്ളിൽ പിഴ അടയ്ക്കാതെ കേസ് കോടതി നടപടികളിലേക്ക് കടക്കുകയാണെങ്കിൽ ശിക്ഷ 4 പെനാൽറ്റി പോയിന്റായി വർദ്ധിക്കാനും സാധ്യതയുണ്ട്.

ടയർ സുരക്ഷാ ദിനത്തോടനുബന്ധിച്ച് ഐറിഷ് ടയർ ഇൻഡസ്ട്രി അസോസിയേഷന്റെ (ITIA) കീഴിലുള്ള രാജ്യത്തുടനീളമുള്ള അംഗീകൃത ഗാരേജുകളിൽ വാഹന ഉടമകൾക്ക് സൗജന്യമായി ടയറുകൾ പരിശോധിക്കാനുള്ള അവസരം ഒരുക്കിയിട്ടുണ്ട്. നിങ്ങളുടെ ടയറുകളുടെ പൊതുവായ കണ്ടീഷൻ, കാറ്റ് (Tyre pressure), ട്രെഡ് ഡെപ്ത് (Tread depth) എന്നിവ ഈ കേന്ദ്രങ്ങളിൽ നിന്നും തികച്ചും സൗജന്യമായി പരിശോധിച്ച് ഉറപ്പുവരുത്താം. നിങ്ങളുടെ തൊട്ടടുത്തുള്ള ITIA അംഗീകൃത കേന്ദ്രം ഏതാണെന്ന് കണ്ടെത്താൻ itia.ie എന്ന വെബ്സൈറ്റ് സന്ദർശിക്കാവുന്നതാണ്.

ശൈത്യകാലം അടുക്കുന്ന സാഹചര്യത്തിൽ റോഡുകളിൽ വാഹനങ്ങൾ തെന്നിമാറിയുള്ള അപകടങ്ങൾ വർദ്ധിക്കാൻ സാധ്യതയുള്ളതിനാൽ, തങ്ങളുടെ വാഹനങ്ങളുടെ ടയറുകൾ സുരക്ഷിതമാണെന്ന് ഉറപ്പുവരുത്താൻ എല്ലാ ഡ്രൈവർമാരും തയ്യാറാകണമെന്ന് ഗാർഡയും RSA-യും അഭ്യർത്ഥിച്ചു.