വീണ്ടും കോവിഡ് ഭീതിയോ? അയർലൻഡിൽ ‘അമേരിക്കൻ കോവിഡ്’ പടരുന്നു; പോസിറ്റീവായാൽ 5 ദിവസം വീടിന് പുറത്തിറങ്ങരുത്, അറിയേണ്ടതെല്ലാം!

അയർലൻഡിലും യുകെയിലുമായി കോവിഡിന്റെ പുതിയ വകഭേദം പടരുന്നതായി റിപ്പോർട്ടുകൾ.’അമേരിക്കൻ കോവിഡ്’ എന്ന് വിശേഷിപ്പിക്കപ്പെടുന്ന പുതിയ എക്സ്.എഫ്.ജി (XFG) കോവിഡ് വകഭേദമാണ് ഇപ്പോൾ വ്യാപകമായി പടരുന്നത്.കോവിഡ് കേസുകൾ വീണ്ടും വർദ്ധിക്കുന്ന സാഹചര്യത്തിൽ ജനങ്ങൾ കർശന ജാഗ്രത പാലിക്കണമെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു.

എന്താണ് പുതിയ എച്ച്.എസ്.ഇ (HSE) മാർഗ്ഗനിർദ്ദേശങ്ങൾ?

അയർലൻഡിലെ ആരോഗ്യവകുപ്പായ എച്ച്.എസ്.ഇ (HSE) യുടെ ഏറ്റവും പുതിയ നിർദ്ദേശപ്രകാരം, കോവിഡ് പോസിറ്റീവാകുന്ന വ്യക്തികൾ നിർബന്ധമായും 5 ദിവസം വീടിനുള്ളിൽ തന്നെ കഴിയണം (സെൽഫ് ഐസൊലേഷൻ).

5 ദിവസത്തെ ക്വാറന്റീൻ: നിങ്ങൾക്ക് കോവിഡ് ലക്ഷണങ്ങൾ ഇല്ലെങ്കിലും ടെസ്റ്റ് റിസൾട്ട് പോസിറ്റീവായാൽ അന്ന് മുതൽ 5 ദിവസം വീട്ടിൽ തുടരേണ്ടതാണ്.
രോഗലക്ഷണങ്ങൾ ഉള്ളവർ: കോവിഡ് ലക്ഷണങ്ങൾ ആരംഭിച്ച ദിവസം മുതലാണ് ഐസൊലേഷൻ കണക്കാക്കേണ്ടത്. 5 ദിവസത്തിന് ശേഷം, നിങ്ങളുടെ രോഗലക്ഷണങ്ങൾ പൂർണ്ണമായി മാറുകയോ, അല്ലെങ്കിൽ കഴിഞ്ഞ 48 മണിക്കൂറായി ലക്ഷണങ്ങൾ ഇല്ലാതിരിക്കുകയോ ചെയ്താൽ മാത്രമേ പുറത്തിറങ്ങാൻ പാടുള്ളൂ.
സമ്പർക്കം ഒഴിവാക്കുക: കോവിഡ് ബാധിക്കാൻ സാധ്യത കൂടുതലുള്ളവരുമായോ (very high risk) പ്രതിരോധശേഷി കുറഞ്ഞവരുമായോ ഉള്ള സമ്പർക്കം 10 ദിവസത്തേക്ക് പൂർണ്ണമായും ഒഴിവാക്കണം.

പുതിയ വകഭേദത്തിന്റെ ലക്ഷണങ്ങൾ

സാധാരണ കോവിഡ് ലക്ഷണങ്ങൾക്ക് പുറമെ ചില പ്രത്യേക ലക്ഷണങ്ങളും ഈ പുതിയ അമേരിക്കൻ വകഭേദത്തിന് കാണാറുണ്ട്. ശക്തമായ പനി, തൊണ്ടവേദന, വിട്ടുമാറാത്ത ചുമ, കടുത്ത ക്ഷീണം, ശരീരവേദന എന്നിവയാണ് പ്രധാന ലക്ഷണങ്ങൾ. ചിലരിൽ ഘ്രാണശക്തിയും (മണം) രുചിയും നഷ്ടപ്പെടുന്നതും ആഴ്ചകളോളം നീണ്ടുനിൽക്കാമെന്ന് എച്ച്.എസ്.ഇ വ്യക്തമാക്കുന്നു.

എപ്പോഴാണ് ഡോക്ടറെ സമീപിക്കേണ്ടത്?

രോഗലക്ഷണങ്ങൾ ഉള്ളവർ ആശുപത്രികളിലോ ഫാർമസികളിലോ നേരിട്ട് പോകാൻ പാടില്ല. പകരം ഫോൺ വഴി ഡോക്ടറെ ബന്ധപ്പെടുക. താഴെ പറയുന്ന സാഹചര്യങ്ങളിൽ നിങ്ങളുടെ ജിപിയെ (GP) വിളിക്കേണ്ടതാണ്:

ശ്വാസതടസ്സം അനുഭവപ്പെടുകയോ ശ്വസന പ്രക്രിയയിൽ വ്യത്യാസം തോന്നുകയോ ചെയ്താൽ.
ചുമ വളരെ കൂടുതലാവുകയാണെങ്കിൽ.
കടുത്ത ആരോഗ്യപ്രശ്നങ്ങൾ അനുഭവപ്പെട്ടാൽ.

നിങ്ങളുടെ ജിപിയെ ലഭ്യമാകാത്ത അടിയന്തര സാഹചര്യങ്ങളിൽ 112 അല്ലെങ്കിൽ 999 എന്ന നമ്പറിൽ ബന്ധപ്പെടാവുന്നതാണ്.

സഹായങ്ങൾക്കും മാനസിക പിന്തുണയ്ക്കും

5 ദിവസത്തോളം വീടിനുള്ളിൽ അടച്ചിരിക്കുന്നത് പലരിലും മാനസിക സമ്മർദ്ദമുണ്ടാക്കാൻ സാധ്യതയുണ്ട്. അതിനാൽ ഫോൺ വഴിയോ ഇന്റർനെറ്റ് വഴിയോ സുഹൃത്തുക്കളുമായും കുടുംബാംഗങ്ങളുമായും സമ്പർക്കം പുലർത്താൻ എച്ച്.എസ്.ഇ നിർദ്ദേശിക്കുന്നു. പ്രായമായവർക്ക് സഹായത്തിനായി ‘അലോൺ’ (ALONE) എന്ന ചാരിറ്റിയുടെ 0818 222 024 എന്ന നമ്പറിലോ, എച്ച്.എസ്.ഇ ഹെൽപ്പ് ലൈനായ 1800 700 700 എന്ന നമ്പറിലോ വിളിക്കാവുന്നതാണ്.