അയർലൻഡിലെ യൂണിവേഴ്സിറ്റി ഓഫ് ലിമെറിക്കിന് സമീപമുള്ള വിദ്യാർത്ഥി താമസ കേന്ദ്രത്തിൽ നടന്ന അതിക്രമം വലിയ വിവാദങ്ങൾക്ക് വഴിയൊരുക്കുന്നു. ലിമെറിക്കിലെ കോളേജ് കോർട്ട് ഹൗസിംഗ് എസ്റ്റേറ്റിലെ ആറു കിടപ്പുമുറികളുള്ള വീട് ഒരു സംഘം യുവാക്കൾ ചേർന്ന് അടിച്ചുതകർക്കുകയായിരുന്നു. ബുധനാഴ്ച പുലർച്ചെയുണ്ടായ ഈ അക്രമം നാടിനെയാകെ ഞെട്ടിച്ചിരിക്കുകയാണ്. സംഭവത്തിൽ ക്രിമിനൽ കേസെടുത്ത് ഐറിഷ് പൊലീസായ ഗാർഡ സിയോച്ചാന അന്വേഷണം ആരംഭിച്ചു.

സമൂഹമാധ്യമങ്ങളിൽ പ്രചരിക്കുന്ന ദൃശ്യങ്ങൾ അക്രമത്തിന്റെ തീവ്രത വെളിപ്പെടുത്തുന്നതാണ്. വീടിന്റെ ചുവരുകൾ തുളച്ചും സീലിംഗ് ഫിക്ചറുകൾ നശിപ്പിച്ചും അക്രമികൾ അഴിഞ്ഞാടുന്ന ദൃശ്യങ്ങളാണ് പുറത്തുവന്നിരിക്കുന്നത്. വീടിന്റെ ജനാലകളിലൂടെ സാധനങ്ങൾ പുറത്തേക്ക് വലിച്ചെറിയുന്നതും മുകൾനിലയിൽ നിന്ന് താഴേക്ക് ചാടുന്നതുമെല്ലാം ദൃശ്യങ്ങളിൽ വ്യക്തമാണ്. ഏകദേശം 500,000 യൂറോ വിലമതിക്കുന്ന വീട് പൂർണമായും വാസയോഗ്യമല്ലാതായി മാറി. വീട് നന്നാക്കുന്നതിനായി പതിനായിരക്കണക്കിന് യൂറോ ചെലവാകുമെന്നാണ് പ്രാഥമിക വിലയിരുത്തൽ.

സംഭവം സർവകലാശാലയുടെ സൽപ്പേരിന് വലിയ കളങ്കമുണ്ടാക്കിയതായി യൂണിവേഴ്സിറ്റി ഓഫ് ലിമെറിക് ഇടക്കാല പ്രൊവോസ്റ്റ് പ്രൊഫസർ ആൻ ലെഡ്‌വിത്ത് വ്യക്തമാക്കി. പ്രതികൾ സർവകലാശാലയിലെ വിദ്യാർത്ഥികളാണോ എന്ന് സ്ഥിരീകരിച്ചിട്ടില്ലെങ്കിലും, ക്യാമ്പസ് പരിസരത്ത് ഇത്തരമൊരു സംഭവം നടന്നത് പ്രദേശവാസികൾക്കിടയിൽ വലിയ പ്രതിഷേധത്തിന് കാരണമായിട്ടുണ്ട്. സർവകലാശാലയും നാട്ടുകാരും തമ്മിലുള്ള ബന്ധത്തെ ഈ സംഭവം വല്ലാതെ ഉലച്ചിരിക്കുകയാണ്.

അന്വേഷണത്തിന്റെ ഭാഗമായി ഒക്ടോബർ ഏഴിന് പുലർച്ചെ 12 മുതൽ രണ്ട് മണി വരെയുള്ള സമയത്ത് കോളേജ് കോർട്ട് പരിസരത്തുണ്ടായിരുന്നവർ ദൃശ്യങ്ങൾ കൈമാറണമെന്ന് ഗാർഡ ആവശ്യപ്പെട്ടു. ഫോറൻസിക് വിദഗ്ധർ സ്ഥലത്തെത്തി പരിശോധന പൂർത്തിയാക്കി. സോഷ്യൽ മീഡിയയിൽ വൈറലായ ദൃശ്യങ്ങളും സിസിടിവി ദൃശ്യങ്ങളും കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്. കുറ്റവാളികളെ പിടികൂടാൻ സർവകലാശാലാ അധികൃതർ പൊലീസുമായി പൂർണമായി സഹകരിക്കുമെന്ന് അറിയിച്ചിട്ടുണ്ട്. വിദ്യാർത്ഥികൾ തിങ്ങിപ്പാർക്കുന്ന പ്രദേശങ്ങളിലെ സുരക്ഷയെക്കുറിച്ചും അച്ചടക്കത്തെക്കുറിച്ചും ഗൗരവമായ ചർച്ചകൾക്കാണ് ഈ സംഭവം വഴിയൊരുക്കിയിരിക്കുന്നത്.