അയർലൻഡിലെ പൗരത്വ നിയമങ്ങളിൽ നിർണായക മാറ്റങ്ങൾ വരുത്തുന്നതിനുള്ള കരട് ബിൽ ഈ ആഴ്ച മന്ത്രിസഭയുടെ പരിഗണനയ്ക്ക് എത്തും. ജസ്റ്റിസ് മന്ത്രി ജിം ഒക്കല്ലഗൻ അവതരിപ്പിക്കുന്ന ഐറിഷ് നാഷണാലിറ്റി ആൻഡ് സിറ്റിസൺഷിപ്പ് ഭേദഗതി ബിൽ 2026 നിലവിലെ പൗരത്വ നിയമങ്ങളെ അടിമുടി മാറ്റിയെഴുതാനാണ് ലക്ഷ്യമിടുന്നത്. അയർലൻഡിൽ പൗരത്വത്തിനായി അപേക്ഷിക്കുന്നവർക്ക് കൂടുതൽ കർശനവും ചിട്ടപ്പെടുത്തിയതുമായ മാനദണ്ഡങ്ങൾ ഏർപ്പെടുത്തുന്നതാണ് പുതിയ പരിഷ്കാരം.

പുതിയ നിയമപ്രകാരം പൗരത്വത്തിനായി അപേക്ഷിക്കുന്നവർ എട്ടു വർഷത്തെ താമസരേഖ ഹാജരാക്കണം. അപേക്ഷ നൽകുന്നതിന് തൊട്ടുമുമ്പുള്ള രണ്ട് വർഷം തുടർച്ചയായി അയർലൻഡിൽ താമസിച്ചിരിക്കണമെന്നതാണ് പ്രധാന നിബന്ധന. ഇതിനു പുറമെ, കഴിഞ്ഞ പത്തു വർഷത്തിനിടയിൽ ആറു വർഷം കൂടി രാജ്യത്ത് താമസിച്ചിരിക്കണം. രാജ്യത്തിന്റെ സാമ്പത്തിക സാമൂഹിക മേഖലകളിൽ അപേക്ഷകർ പൂർണമായി ലയിച്ചുചേർന്നു എന്ന് ഉറപ്പാക്കുന്നതിനാണ് ഈ വ്യവസ്ഥ. എന്നാൽ ഉക്രെയ്നിൽ നിന്നുള്ള അഭയാർത്ഥികൾക്ക് ലഭിച്ച താൽക്കാലിക സംരക്ഷണ കാലയളവ് പൗരത്വത്തിനായുള്ള താമസ കാലാവധിയായി കണക്കാക്കില്ലെന്ന് അധികൃതർ വ്യക്തമാക്കി.

പൗരത്വ നിയമങ്ങളിൽ ആദ്യമായാണ് ഭാഷാപ്രാവീണ്യം നിർബന്ധമാക്കുന്നത്. ഇംഗ്ലീഷിലോ ഐറിഷ് ഭാഷയിലോ ആശയവിനിമയം നടത്താനുള്ള കഴിവ് അപേക്ഷകർക്ക് ഉണ്ടായിരിക്കണം. ഇതിനു പുറമെ അയർലൻഡിന്റെ രാഷ്ട്രീയ വ്യവസ്ഥ, ചരിത്രം, സാമൂഹിക മൂല്യങ്ങൾ എന്നിവ സംബന്ധിച്ച സിവിക്സ് പരീക്ഷയും പാസാകണം. യൂറോപ്യൻ രാജ്യങ്ങളിൽ നിലവിലുള്ളതിന് സമാനമായ കർശന രീതികൾ അയർലൻഡിലും നടപ്പിലാക്കുകയാണ് ഈ നീക്കത്തിലൂടെ സർക്കാർ ലക്ഷ്യമിടുന്നത്.

വിവാഹത്തിലൂടെ പൗരത്വത്തിന് അപേക്ഷിക്കുന്നവരുടെ കാര്യത്തിലും കർശന വ്യവസ്ഥകളാണ് ഏർപ്പെടുത്തുന്നത്. ഐറിഷ് പൗരന്മാരെ വിവാഹം കഴിക്കുന്നവർ അഞ്ച് വർഷത്തെ ദാമ്പത്യം പൂർത്തിയാക്കിയാൽ മാത്രമേ പൗരത്വത്തിന് അർഹരാവുകയുള്ളൂ. കൂടാതെ അപേക്ഷകരുടെ വരുമാനം, സാമൂഹിക ക്ഷേമ പദ്ധതികളുടെ ഉപയോഗം എന്നിവ സംബന്ധിച്ചും കൂടുതൽ പരിശോധനകൾ ഉണ്ടാകും. പുതിയ പൗരന്മാർ രാജ്യത്തിന്റെ സാമ്പത്തിക പുരോഗതിയിൽ സജീവ പങ്കാളികളാകുന്നുവെന്ന് ഉറപ്പാക്കുകയാണ് ഇതിന്റെ ലക്ഷ്യം.

ബിൽ മന്ത്രിസഭയുടെ പരിഗണനയ്ക്ക് എത്തുന്നതോടെ രാഷ്ട്രീയ തലത്തിൽ വലിയ ചർച്ചകൾക്ക് വഴിയൊരുങ്ങുമെന്നാണ് കരുതുന്നത്. നിയമം കൂടുതൽ വ്യക്തത വരുത്തുന്നുവെന്നും പൗരത്വം അർഹരായവർക്ക് മാത്രം ലഭിക്കുമെന്ന് ഉറപ്പാക്കുന്നുവെന്നും അനുകൂലികൾ വാദിക്കുന്നു. അതേസമയം ദീർഘകാലമായി അയർലൻഡിൽ താമസിക്കുന്നവർക്ക് പൗരത്വം ലഭിക്കുന്നത് കൂടുതൽ പ്രയാസകരമാകുമെന്ന് വിമർശകരും അഭിപ്രായപ്പെടുന്നു. സർക്കാർ മുൻഗണന നൽകിയാൽ വരും ദിവസങ്ങളിൽ തന്നെ ബിൽ ഒയരക്തസിൽ അവതരിപ്പിക്കാനും നിയമമാക്കാനും സാധ്യതയുണ്ട്.