അയർലൻഡിലെ പബ്ബുകളിലും ഹോട്ടലുകളിലും മദ്യപരിശോധനാ യന്ത്രങ്ങൾ സ്ഥാപിക്കാനുള്ള റോഡ് സേഫ്റ്റി അതോറിറ്റിയുടെ (RSA) വിവാദ പദ്ധതി ഉപേക്ഷിച്ചു. 1.5 ദശലക്ഷം യൂറോ ചെലവിൽ നടപ്പിലാക്കാൻ ഉദ്ദേശിച്ചിരുന്ന പദ്ധതി ടെൻഡർ വിളിച്ച് 24 മണിക്കൂറിനുള്ളിലാണ് അതോറിറ്റി റദ്ദാക്കിയത്. പദ്ധതിക്കെതിരെ രാഷ്ട്രീയ കേന്ദ്രങ്ങളിൽ നിന്നും പൊതുജനങ്ങളിൽ നിന്നും കടുത്ത വിമർശനം ഉയർന്ന സാഹചര്യത്തിലാണ് നടപടി.

രാജ്യത്തെ പബ്ബുകൾ, ഗോൾഫ് ക്ലബ്ബുകൾ, ഹോട്ടലുകൾ തുടങ്ങിയ ഇടങ്ങളിൽ 20 ഇൻ്ററാക്ടീവ് ബ്രെത്ത്‌ലൈസർ ടെർമിനലുകൾ സ്ഥാപിക്കാനായിരുന്നു RSA ലക്ഷ്യമിട്ടത്. വാഹനമോടിക്കുന്നവർക്ക് തങ്ങളുടെ രക്തത്തിലെ മദ്യത്തിന്റെ അളവ് സ്വയം പരിശോധിക്കാൻ അവസരമൊരുക്കുകയായിരുന്നു പദ്ധതിയുടെ ലക്ഷ്യം. 2024 ഓഗസ്റ്റ് മുതൽ 2025 ഫെബ്രുവരി വരെ നടത്തിയ പൈലറ്റ് പ്രോജക്റ്റിന്റെ അടിസ്ഥാനത്തിലാണ് ഇത്തരമൊരു തീരുമാനത്തിലേക്ക് അധികൃതർ എത്തിയത്.

പൈലറ്റ് പ്രോജക്റ്റിൽ പങ്കെടുത്ത 45 ശതമാനം പേരും തങ്ങൾ നിയമപരിധിക്കുള്ളിലാണെന്ന് തെറ്റായി വിശ്വസിച്ചവരായിരുന്നു. യഥാർത്ഥത്തിൽ ഇവർ പരിധി ലംഘിച്ചവരായിരുന്നുവെന്നും 77 ശതമാനം പേരും തങ്ങൾ സുരക്ഷിതരാണെന്ന് തെറ്റിദ്ധരിച്ച് വാഹനം ഓടിക്കാൻ തയ്യാറായവരായിരുന്നുവെന്നും കണക്കുകൾ വ്യക്തമാക്കുന്നു. 18 നും 34 നും ഇടയിൽ പ്രായമുള്ള യുവാക്കളാണ് ഇത്തരത്തിൽ മദ്യത്തിന്റെ അളവ് കുറച്ചു കാണിക്കുന്നതിൽ മുന്നിലെന്നും പഠനം സൂചിപ്പിക്കുന്നു.

എങ്കിലും പദ്ധതിക്കെതിരെ രൂക്ഷമായ പ്രതിഷേധമാണ് ഉയർന്നത്. മദ്യപിച്ച് വാഹനമോടിക്കുന്നതിനെതിരായ അയർലൻഡിന്റെ കർശന നിലപാടിന് പദ്ധതി വിഘാതമാകുമെന്ന് സോഷ്യൽ ഡെമോക്രാറ്റ്സ് പ്രതിനിധി ഐഡൻ ഫാരെല്ലി ടിഡി കുറ്റപ്പെടുത്തി. ഒയ്‌റെക്റ്റസ് ട്രാൻസ്പോർട്ട് കമ്മിറ്റി ചെയർമാൻ മൈക്കൽ മർഫി, റോഡ് സുരക്ഷാ സഹമന്ത്രി സീൻ കാനി എന്നിവരും പദ്ധതിയെ എതിർത്ത് രംഗത്തെത്തി. താൻ പോലും അറിയാതെയാണ് ഇത്തരമൊരു തീരുമാനം ഉണ്ടായതെന്ന് മന്ത്രി സീൻ കാനി പ്രതികരിച്ചു. മദ്യപിച്ച് വാഹനം ഓടിക്കുന്നതിനെതിരെ സർക്കാർ സ്വീകരിക്കുന്ന സീറോ ടോളറൻസ് നയത്തിന് വിരുദ്ധമാണ് ഈ പദ്ധതിയെന്ന് അദ്ദേഹം ചൂണ്ടിക്കാട്ടി.

വിമർശനങ്ങൾ ഉയർന്നതോടെ പദ്ധതിയിൽ നിന്ന് പിന്മാറുകയാണെന്ന് RSA ഔദ്യോഗികമായി അറിയിച്ചു. മദ്യപിച്ചാൽ വാഹനമോടിക്കരുത് എന്ന അടിസ്ഥാന സന്ദേശത്തിൽ മാറ്റമില്ലെന്നും ജനങ്ങളിൽ ബോധവൽക്കരണം നടത്തുന്നതിലാണ് ഇനി ശ്രദ്ധ കേന്ദ്രീകരിക്കുന്നതെന്നും അധികൃതർ വ്യക്തമാക്കി. സാങ്കേതിക വിദ്യയിലൂടെ ജനങ്ങളെ ബോധവൽക്കരിക്കാൻ ശ്രമിച്ചെങ്കിലും രാഷ്ട്രീയതലത്തിൽ ഉണ്ടായ ഏകസ്വരത്തിലുള്ള എതിർപ്പ് കണക്കിലെടുത്ത് പദ്ധതി ഉപേക്ഷിക്കാൻ നിർബന്ധിതരാവുകയായിരുന്നു എന്ന് RSA വൃത്തങ്ങൾ കൂട്ടിച്ചേർത്തു.