അയർലൻഡിൽ പൗരത്വം നേടുന്നതിനുള്ള മാനദണ്ഡങ്ങൾ കർശനമാക്കാൻ സർക്കാർ ഒരുങ്ങുന്നു. നിലവിൽ അഞ്ച് വർഷമായിരുന്ന താമസ കാലാവധി എട്ട് വർഷമായി ഉയർത്തുന്നതിനുള്ള നിർദ്ദേശത്തിന് പ്രധാനമന്ത്രി മൈക്കൽ മാർട്ടിൻ അംഗീകാരം നൽകി. കുടിയേറ്റ നയങ്ങളിൽ വരുത്തുന്ന സമഗ്രമായ മാറ്റങ്ങളുടെ ഭാഗമായാണ് പുതിയ തീരുമാനം. ജസ്റ്റിസ് മിനിസ്റ്റർ ജിം ഒക്കല്ലഗന്റെ നേതൃത്വത്തിലുള്ള പുതിയ നിയമപരിഷ്കാരങ്ങൾ അന്താരാഷ്ട്ര നിലവാരത്തിനനുസരിച്ച് ഐറിഷ് കുടിയേറ്റ നിയമങ്ങളെ മാറ്റിയെഴുതുക എന്ന ലക്ഷ്യത്തോടെയാണ് നടപ്പിലാക്കുന്നത്.
പുതിയ നിയമം നിലവിൽ വരുന്നതോടെ താമസ കാലാവധി വർധിപ്പിക്കുക മാത്രമല്ല, കൂടുതൽ കർശനമായ നിബന്ധനകൾ അപേക്ഷകർ പാലിക്കേണ്ടി വരും. ഇംഗ്ലീഷ് അല്ലെങ്കിൽ ഐറിഷ് ഭാഷകളിലുള്ള പ്രാവീണ്യ പരിശോധന, സർക്കാർ സഹായത്തെ ആശ്രയിക്കാതെ തന്നെ ജീവിക്കാൻ കഴിയുമെന്ന് തെളിയിക്കുന്ന സാമ്പത്തിക ശേഷി എന്നിവ നിർബന്ധമാക്കും. കുടുംബാംഗങ്ങളെ ഒപ്പം താമസിപ്പിക്കുന്നതുമായി ബന്ധപ്പെട്ട നിയന്ത്രണങ്ങളിലും മാറ്റങ്ങൾ വരുന്നുണ്ട്.
സർക്കാരിന്റെ ഈ തീരുമാനത്തിനെതിരെ വിവിധ സംഘടനകൾ ഇതിനകം രംഗത്തെത്തിയിട്ടുണ്ട്. ഐറിഷ് റെഫ്യൂജി കൗൺസിൽ, ഇമ്മിഗ്രന്റ് കൗൺസിൽ ഓഫ് അയർലൻഡ്, ഐറിഷ് കൗൺസിൽ ഫോർ സിവിൽ ലിബർട്ടീസ് എന്നീ സംഘടനകൾ സംയുക്തമായി ആശങ്ക രേഖപ്പെടുത്തി. എട്ട് വർഷത്തെ താമസ കാലാവധി കുടിയേറ്റക്കാരെ സമൂഹവുമായി ഇണങ്ങിച്ചേരുന്നതിൽ നിന്ന് തടയുമെന്നും ഇത് അവരിൽ ഒഴിവാക്കപ്പെട്ടുവെന്ന തോന്നൽ സൃഷ്ടിക്കുമെന്നും അവർ വിമർശിക്കുന്നു.
പ്രതിപക്ഷവും സർക്കാരിന്റെ നീക്കത്തെ രൂക്ഷമായി വിമർശിച്ചിട്ടുണ്ട്. തൊഴിൽ മേഖലയിലെ വിദഗ്ധരെ ആകർഷിക്കുന്നതിൽ അയർലൻഡിന്റെ മത്സരശേഷിയെ ഈ മാറ്റം ദോഷകരമായി ബാധിക്കുമെന്ന് ലേബർ പാർട്ടി വക്താവ് അലൻ കെല്ലി ടിഡി പറഞ്ഞു. നിലവിൽ നിയമപരമായ അപേക്ഷ സമർപ്പിക്കാത്ത എല്ലാവർക്കും ഈ എട്ട് വർഷത്തെ നിബന്ധന ബാധകമാകുമെന്ന റിപ്പോർട്ടുകൾ ആശങ്ക വർധിപ്പിച്ചിട്ടുണ്ട്. ഈ വർഷാവസാനത്തോടെ പുതിയ നിയമം പ്രാബല്യത്തിൽ വരുമെന്നാണ് കരുതപ്പെടുന്നത്.
അതേസമയം, യുക്രെയ്നിൽ നിന്നുള്ള അഭയാർത്ഥികൾക്ക് ഈ പുതിയ നിബന്ധനയിൽ നിന്ന് ഇളവ് നൽകാൻ സർക്കാർ തീരുമാനിച്ചു. ഇവർക്ക് എട്ട് വർഷത്തെ നിബന്ധന ബാധകമായിരിക്കില്ല. ഈ ആഴ്ച ചേരുന്ന മന്ത്രിസഭാ യോഗത്തിൽ ബിൽ ചർച്ച ചെയ്യും. തലമുറകൾക്കിടയിൽ അയർലൻഡ് നടപ്പിലാക്കുന്ന ഏറ്റവും വലിയ കുടിയേറ്റ നയപരിഷ്കാരമായാണ് ഇതിനെ വിലയിരുത്തുന്നത്. നിലവിൽ ഐആർപി കാർഡുകൾ കൈവശമുള്ളവരെയും ദീർഘകാല താമസാനുമതിക്കായി കാത്തിരിക്കുന്നവരെയും പുതിയ നിയമം എങ്ങനെ ബാധിക്കുമെന്നതാണ് ഏവരും ഉറ്റുനോക്കുന്നത്.