കഴിഞ്ഞ ജൂൺ 18-നാണ് ഈ ഞെട്ടിക്കുന്ന സംഭവം നടന്നത്. സർക്കാർ മരുന്നുകൾക്കായി എത്ര രൂപ ചിലവാക്കുന്നുണ്ട് എന്നതടക്കമുള്ള വിവരങ്ങൾ ശേഖരിക്കുന്നതിനായി എഐയോട് ആവശ്യപ്പെട്ടിരുന്നു. ഇതിനായി ഓസ്ട്രേലിയൻ സർക്കാരിന്റെ മെഡിക്കെയർ (Medicare) പോർട്ടലിൽ എത്തിയ എഐ മോഡലിന് വിവരങ്ങൾ ലഭിക്കാതെ വരികയും വെബ്സൈറ്റ് വിലക്കുകയും ചെയ്തു. എന്നാൽ പിന്മാറുന്നതിന് പകരം, എഐ മോഡൽ സുരക്ഷാ ക്രമീകരണങ്ങൾ സ്വയം ഭേദിച്ച് (scaled the fence) വെബ്സൈറ്റിലേക്ക് നുഴഞ്ഞുകയറുകയായിരുന്നു എന്ന് ഓസ്ട്രേലിയൻ മന്ത്രിമാർ അറിയിച്ചു.

ഏറ്റവും വലിയ വീഴ്ച സംഭവിച്ചിരിക്കുന്നത് ചാറ്റ്ജിപിടിയുടെ സ്രഷ്ടാക്കളായ ഓപ്പൺഎഐയുടെ ഭാഗത്തുനിന്നാണ്. ജൂണിൽ ഹാക്കിങ് നടന്നെങ്കിലും ഓഗസ്റ്റിൽ മാത്രമാണ് കമ്പനി ഇതറിയുന്നത്. എന്നാൽ സെപ്റ്റംബർ 10 വരെ അവർ ഓസ്ട്രേലിയൻ സർക്കാരിനെ ഈ വിവരം അറിയിച്ചില്ല. അതും സർക്കാരിന്റെ ഒരു സാധാരണ ഇമെയിൽ ഇൻബോക്സിലേക്ക് ഒരു മെസ്സേജ് അയക്കുക മാത്രമാണ് ചെയ്തത്. ഈ കാലതാമസം വലിയ ആശങ്കയുണ്ടാക്കുന്നതാണെന്ന് പ്രധാനമന്ത്രി ആന്റണി ആൽബനീസ് പറഞ്ഞു.

ന്യൂയോർക്കിൽ നടക്കുന്ന യുഎൻ ജനറൽ അസംബ്ലിക്കിടെ സംസാരിക്കുകയായിരുന്നു അദ്ദേഹം. ഓപ്പൺഎഐ സിഇഒ സാം ആൾട്ട്മാനുമായി താൻ സംസാരിച്ചെന്നും, ഈ സംഭവത്തിലുള്ള കടുത്ത അതൃപ്തി അദ്ദേഹത്തെ നേരിട്ട് അറിയിച്ചുവെന്നും ആൽബനീസ് വ്യക്തമാക്കി.

അതേസമയം, ആളുകളുടെ വ്യക്തിഗത വിവരങ്ങളോ രോഗികളുടെ മെഡിക്കൽ റെക്കോർഡുകളോ എഐ ചോർത്തിയിട്ടില്ലെന്ന് സർക്കാർ വ്യക്തമാക്കിയിട്ടുണ്ട്. പൊതുവായ ആരോഗ്യ സ്ഥിതിവിവരക്കണക്കുകളും, ചില ഫയലുകളുടെ പേരുകളും മാത്രമാണ് എഐ മോഡൽ പരിശോധിച്ചത്. എങ്കിലും, സർക്കാർ വെബ്സൈറ്റുകളുടെ സുരക്ഷാ വീഴ്ചകളെക്കുറിച്ച് ഫോറൻസിക് അന്വേഷണം പ്രഖ്യാപിച്ചിരിക്കുകയാണ് ഓസ്ട്രേലിയൻ സർക്കാർ.

തങ്ങളുടെ എഐ മോഡലുകളുടെ പ്രവർത്തനങ്ങൾ പരിശോധിക്കുന്നതിനിടെയാണ് ഈ സംഭവം ശ്രദ്ധയിൽപ്പെട്ടതെന്ന് ഓപ്പൺഎഐ പ്രതികരിച്ചു. ഓസ്ട്രേലിയയെക്കുറിച്ചുള്ള ചില ചോദ്യങ്ങൾക്ക് ഉത്തരം കണ്ടെത്താൻ ശ്രമിക്കുന്നതിനിടെ, തങ്ങൾ ഉദ്ദേശിക്കാത്ത ചില കാര്യങ്ങൾ മോഡലുകൾ സ്വന്തമായി ചെയ്യുകയായിരുന്നു എന്നാണ് കമ്പനിയുടെ വിശദീകരണം. ഭാവിയിൽ ഇത്തരം സംഭവങ്ങൾ ആവർത്തിക്കാതിരിക്കാനുള്ള നടപടികൾ സ്വീകരിക്കുമെന്നും അവർ അറിയിച്ചു. വിനാശകരമായ സൈബർ ആക്രമണങ്ങൾക്ക് നിർമ്മിത ബുദ്ധി കാരണമായേക്കാം എന്ന ലോകത്തിന്റെ ആശങ്കകൾ ശരിവെക്കുന്നതാണ് പുതിയ സംഭവം.