ഡബ്ലിനിൽ 269 ക്രിമിനൽ കേസുകളിൽ പ്രതിയായ 44 വയസ്സുകാരന്റെ ജയിൽ ശിക്ഷയിൽ കോടതി ഇളവ് നൽകി. ഡബ്ലിൻ ഗ്ലോസസ്റ്റർ ഡയമണ്ട് പാർക്ക് സ്വദേശി തോമസ് ഓ ഡ്രിസ്കോളിന്റെ ശിക്ഷാ കാലാവധിയാണ് സർക്യൂട്ട് കോടതി മൂന്നു മാസത്തേക്ക് കുറച്ചത്. മൗണ്ട് ജോയ് ജയിലിൽ നിന്ന് വീഡിയോ ലിങ്ക് വഴിയാണ് ഇയാൾ കോടതി നടപടികളിൽ പങ്കെടുത്തത്.

മോഷണം, ഭവനഭേദനം, മോഷ്ടിച്ച വസ്തുക്കൾ കൈവശം വെക്കൽ തുടങ്ങി 21 കേസുകളാണ് ഇയാൾക്കെതിരെ ചുമത്തിയിരുന്നത്. ഈ കേസുകളെ അതീവ ഗൗരവത്തോടെയാണ് ജഡ്ജി മേരി മോറിസി നോക്കിക്കണ്ടത്. കഴിഞ്ഞ ഏപ്രിൽ 10ന് സ്റ്റോർ സ്ട്രീറ്റ് ഗാർഡ സ്റ്റേഷനിൽ വെച്ച് പോലീസുദ്യോഗസ്ഥന്റെ മുഖത്ത് തുപ്പിയ സംഭവമാണ് ഇയാൾക്കെതിരായ പ്രധാന കുറ്റകൃത്യങ്ങളിൽ ഒന്ന്. മറ്റൊരുകേസുമായി ബന്ധപ്പെട്ട് അറസ്റ്റിലായപ്പോഴായിരുന്നു സംഭവം.

ഈ സംഭവത്തിന് 12 ദിവസത്തിന് ശേഷം ജാമ്യത്തിൽ ഇറങ്ങിയ ഉടൻ തന്നെ ഇയാൾ വീണ്ടും കുറ്റം ആവർത്തിച്ചു. സ്റ്റേഷൻ വളപ്പിൽ സൂക്ഷിച്ചിരുന്ന 400 യൂറോ വിലമതിക്കുന്ന ഇ-സ്കൂട്ടർ മോഷ്ടിച്ചതിന് ഇയാൾ ഉടനടി പിടിയിലാവുകയായിരുന്നു. വെസ്റ്റ്മോർലാൻഡ് സ്ട്രീറ്റിൽ നിന്ന് ആയിരം യൂറോ വിലമതിക്കുന്ന റേസിംഗ് സൈക്കിൾ മോഷ്ടിച്ചതിന് ഡിസ്ട്രിക്റ്റ് കോടതി നേരത്തെ ഒമ്പത് മാസത്തെ തടവ് ശിക്ഷ വിധിച്ചിരുന്നു. ഇതിനുപുറമെ പോലീസുകാരനെ ആക്രമിച്ചതിന് മൂന്ന് മാസം അധിക തടവും ലഭിച്ചു.

ദീർഘകാലമായി ചികിത്സ ലഭിക്കാത്ത മാനസിക ആരോഗ്യ പ്രശ്നങ്ങളാണ് താൻ കുറ്റകൃത്യങ്ങളിൽ ഏർപ്പെടാൻ കാരണമെന്ന് പ്രതി കോടതിയിൽ വാദിച്ചു. ജയിലിൽ ലഭിച്ച ചികിത്സയും മരുന്നുകളും തനിക്ക് ആശ്വാസം നൽകിയെന്നും ഇനി കുറ്റകൃത്യങ്ങളിൽ ഏർപ്പെടില്ലെന്നും ഇയാൾ കോടതിയെ അറിയിച്ചു. പോലീസ് ഉദ്യോഗസ്ഥരോട് ക്ഷമാപണം നടത്തിയ പ്രതി, താൻ മദ്യപാനത്തിൽ നിന്നും കുറ്റകൃത്യങ്ങളിൽ നിന്നും മാറി നിൽക്കാൻ ആഗ്രഹിക്കുന്നതായും വ്യക്തമാക്കി.

പ്രതിയുടെ വാദങ്ങളും കേസിലെ സങ്കീർണ്ണതകളും പരിഗണിച്ച ജഡ്ജി മേരി മോറിസി ശിക്ഷാ കാലാവധിയിൽ മൂന്നു മാസത്തെ കുറവ് വരുത്താൻ ഉത്തരവിടുകയായിരുന്നു. മറ്റു ചില കേസുകൾ കൂടി കോടതി ഈ വിധിയിൽ പരിഗണിച്ചു. സ്ഥിരമായി കുറ്റകൃത്യങ്ങളിൽ ഏർപ്പെടുന്ന വ്യക്തിയാണ് പ്രതിയെന്നും, ഇയാൾ പൊതുസമൂഹത്തിന് തന്നെ ഭീഷണിയാണെന്നും കോടതി നിരീക്ഷിച്ചു.