ഡബ്ലിൻ: അയർലൻഡ് തലസ്ഥാനമായ ഡബ്ലിൻ സിറ്റി സെന്ററിലെ ടാൾബോട്ട് സ്ട്രീറ്റിൽ (Talbot Street) വെച്ച് യുവാവിന്റെ സ്വർണ്ണമാല കവർച്ചാ സംഘം കവർന്നു. വൈകുന്നേരം ഏകദേശം 7 മണിയോടെയാണ് ക്രൂരമായ ഈ കവർച്ച നടന്നത്.

ഇരയായ വ്യക്തി സോഷ്യൽ മീഡിയയിലൂടെ വിവരങ്ങൾ പങ്കുവെച്ചതനുസരിച്ച്, തെരുവിലൂടെ നടന്നു പോകുകയായിരുന്ന അദ്ദേഹത്തെ രണ്ട് പേരടങ്ങുന്ന സംഘം തടഞ്ഞുനിർത്തി ആക്രമിക്കുകയായിരുന്നു. ഏകദേശം 5 അടി 7 ഇഞ്ച് പൊക്കമുള്ള, ഹൂഡിയും പച്ചയും കറുപ്പും കലർന്ന ജാക്കറ്റും ധരിച്ച രണ്ടുപേരാണ് കുറ്റകൃത്യത്തിന് പിന്നിൽ. ഇവർ യുവാവിന്റെ കഴുത്തിലെ സ്വർണ്ണമാല ബലമായി പൊട്ടിച്ചെടുത്ത് കടന്നുകളയുകയായിരുന്നു. കവർച്ചയുടെ ശക്തിയിൽ യുവാവിന്റെ കഴുത്തിൽ ആഴത്തിൽ പരിക്കേൽക്കുകയും രക്തം കട്ടപിടിച്ച വലിയ പാടുകൾ വീഴുകയും ചെയ്തിട്ടുണ്ട്.

സംഭവത്തിന് പിന്നാലെ ഇരയായ യുവാവ് അയർലൻഡ് പോലീസായ ഗാർഡയിൽ (Garda) പരാതി നൽകി. നിലവിൽ പോലീസ് അന്വേഷണം ആരംഭിച്ചിട്ടുണ്ട്.

Original Facebook Post: https://www.facebook.com/groups/1418209775065869/permalink/4633187796901368/

ഡബ്ലിൻ സിറ്റി സെന്ററിലും പരിസര പ്രദേശങ്ങളിലും ഇത്തരം കവർച്ചകളും അക്രമങ്ങളും വീണ്ടും വർദ്ധിച്ചു വരുന്ന സാഹചര്യത്തിൽ എല്ലാവരും ജാഗ്രത പാലിക്കണമെന്ന് യുവാവ് അഭ്യർത്ഥിച്ചു. പ്രത്യേകിച്ച് പ്രവാസി മലയാളികളും ഏഷ്യൻ വംശജരും പുറത്തിറങ്ങുമ്പോൾ പെട്ടെന്ന് ശ്രദ്ധയിൽപ്പെടുന്ന രീതിയിലുള്ള സ്വർണ്ണാഭരണങ്ങളും വിലപിടിപ്പുള്ള വസ്തുക്കളും ധരിക്കുന്നത് പരമാവധി ഒഴിവാക്കണമെന്നും മുന്നറിയിപ്പ് നൽകാനാണ് തനിക്കുണ്ടായ ദുരനുഭവം അദ്ദേഹം പങ്കുവെച്ചത്. സിറ്റി സെന്റർ പരിസരത്ത് രാത്രികാലങ്ങളിൽ സഞ്ചരിക്കുന്നവർ അതീവ ശ്രദ്ധ പുലർത്തണമെന്നും നിർദ്ദേശമുണ്ട്.