ഡബ്ലിനിലെ മാറ്റർ ആശുപത്രിക്ക് പതിനായിരം യൂറോ പിഴ ചുമത്തി. ജീവനക്കാരനെ അകാരണമായി സസ്പെൻഡ് ചെയ്ത സംഭവത്തിലാണ് അധികൃതർക്കെതിരെ നടപടി. അയർലൻഡിലെ പൊതുജനാരോഗ്യ മേഖലയിലെ തൊഴിൽ സാഹചര്യങ്ങളെക്കുറിച്ചും എച്ച്ആർ നയങ്ങളെക്കുറിച്ചും വലിയ ചർച്ചകൾക്കാണ് ഈ സംഭവം വഴിവെച്ചിരിക്കുന്നത്.
രോഗി നൽകിയ പരാതിയുടെ അടിസ്ഥാനത്തിലായിരുന്നു ആശുപത്രി അധികൃതരുടെ നടപടി. പരാതിക്കാരൻ ജീവനക്കാരനെക്കുറിച്ച് നൽകിയ വിവരണം വംശീയ അധിക്ഷേപത്തിന് വഴിയൊരുക്കുന്നതായിരുന്നു. ഉയരം കൂടിയ ആൾ, കറുത്ത നിറം, തല മൊട്ടയടിച്ചത്, ഐറിഷ് വംശജനല്ല എന്നിങ്ങനെയായിരുന്നു പരാതിയിലെ വിവരണം. എന്നാൽ, കാര്യങ്ങൾ കൃത്യമായി പരിശോധിക്കുന്നതിന് പകരം, പരാതിക്കാരൻ നൽകിയ ശാരീരിക പ്രത്യേകതകളുമായി സാമ്യമുള്ള ഒരു ജീവനക്കാരനെ ആശുപത്രി മാനേജ്മെന്റ് ഉടൻ സസ്പെൻഡ് ചെയ്യുകയായിരുന്നു. പിന്നീട് നടത്തിയ അന്വേഷണത്തിൽ സസ്പെൻഡ് ചെയ്തത് നിരപരാധിയായ ജീവനക്കാരനെയാണെന്ന് വ്യക്തമായി.
തൊഴിൽ നിയമങ്ങൾ പാലിക്കുന്നതിൽ ആശുപത്രി അധികൃതർക്ക് ഗുരുതരമായ വീഴ്ച സംഭവിച്ചതായി ട്രൈബ്യൂണൽ നിരീക്ഷിച്ചു. വംശീയതയുടെയും ദേശീയതയുടെയും അടിസ്ഥാനത്തിലുള്ള പരാതിയിൽ വസ്തുതകൾ പരിശോധിക്കാതെ നടപടിയെടുത്തത് വിവേചനപരമാണെന്ന് അധികൃതർ ചൂണ്ടിക്കാട്ടി. ഒരു ജീവനക്കാരനോട് കാണിക്കേണ്ട ഉത്തരവാദിത്തം ആശുപത്രി അധികൃതർ പാലിച്ചില്ലെന്നും അനാവശ്യമായ തിടുക്കത്തിൽ എടുത്ത തീരുമാനം നിരപരാധിയായ ജീവനക്കാരന് മാനസികമായും ഔദ്യോഗികമായും വലിയ പ്രയാസമുണ്ടാക്കിയെന്നും ട്രൈബ്യൂണൽ വിലയിരുത്തി.
സംഭവം വൻ വിവാദമായതോടെ ആശുപത്രിയിലെ ഭരണപരമായ സുതാര്യത ചോദ്യം ചെയ്യപ്പെടുകയാണ്. പരാതികളിൽ പക്ഷപാതപരമായ നിലപാടുകൾ ഉണ്ടോ എന്ന് പരിശോധിക്കാൻ ശക്തമായ സംവിധാനങ്ങൾ പൊതുമേഖലാ സ്ഥാപനങ്ങളിൽ വേണമെന്നാണ് ഉയരുന്ന ആവശ്യം. വംശീയതയുടെയോ ദേശീയതയുടെയോ അടിസ്ഥാനത്തിൽ ജീവനക്കാരെ വിലയിരുത്തുന്നത് തൊഴിലിടങ്ങളിലെ തുല്യതാ തത്വങ്ങൾക്ക് വിരുദ്ധമാണെന്നും നിയമവിദഗ്ധർ വ്യക്തമാക്കുന്നു.
തുടർനടപടികളെക്കുറിച്ച് മാറ്റർ ആശുപത്രി അധികൃതരോ പരാതിക്കാരനോ ഔദ്യോഗികമായി പ്രതികരിച്ചിട്ടില്ല. എങ്കിലും, ഐറിഷ് ആരോഗ്യമേഖലയിലെ ജീവനക്കാരുടെ അവകാശങ്ങൾ സംരക്ഷിക്കുന്നതിനായി നിലവിലുള്ള തൊഴിൽ നിയമങ്ങളും എച്ച്ആർ നയങ്ങളും അടിമുടി പരിഷ്കരിക്കണമെന്ന ആവശ്യം ശക്തമായിട്ടുണ്ട്. ഭാവിയിൽ ഇത്തരം വീഴ്ചകൾ ആവർത്തിക്കാതിരിക്കാൻ കർശനമായ നടപടികൾ വേണമെന്നാണ് ഉന്നതതലത്തിലെ ആവശ്യം.