അയർലൻഡിൽ ലഹരിമരുന്ന് ഉപയോഗം തടയുന്നതിലും അവ കൈകാര്യം ചെയ്യുന്നതിലും നിർണായകമായ നയമാറ്റവുമായി സർക്കാർ. വ്യക്തിപരമായ ആവശ്യങ്ങൾക്കായി ലഹരിമരുന്ന് കൈവശം വെക്കുന്നവരിൽ, നിയമനടപടികൾക്ക് പകരം ആരോഗ്യപരമായ ഇടപെടലുകൾക്ക് മുൻഗണന നൽകുന്ന പുതിയ ഹെൽത്ത് റെഫറൽ സ്കീം സെപ്റ്റംബർ ഒന്ന്, 2026 അർധരാത്രി മുതൽ നിലവിൽ വരും.

ആരോഗ്യ മന്ത്രാലയം, നീതിന്യായ മന്ത്രാലയം, ഹെൽത്ത് സർവീസ് എക്സിക്യൂട്ടീവ് (HSE) എന്നിവയുടെ സഹകരണത്തോടെയാണ് ഈ പൈലറ്റ് പദ്ധതി നടപ്പിലാക്കുന്നത്. ലഹരിമരുന്ന് കൈവശം വെക്കുന്ന ചെറിയ കേസുകളിൽ പ്രതികൾക്ക് ക്രിമിനൽ നടപടികളിൽ നിന്ന് മാറി ക്ലിനിക്കൽ ഇടപെടലുകൾ വഴി ജീവിതത്തിലേക്ക് തിരിച്ചുവരാനുള്ള അവസരമാണ് പദ്ധതിയിലൂടെ ലഭിക്കുന്നത്. 18 വയസ്സിന് മുകളിലുള്ളവർക്കാണ് ഈ സൗകര്യം ലഭിക്കുക.

പോലീസിങ്, സെക്യൂരിറ്റി ആൻഡ് കമ്മ്യൂണിറ്റി സേഫ്റ്റി ആക്റ്റ് 2024 പ്രകാരം പബ്ലിക് പ്രോസിക്യൂഷൻ ഡയറക്ടറുടെ അംഗീകാരത്തോടെയാണ് പദ്ധതി രൂപകൽപ്പന ചെയ്തിരിക്കുന്നത്. ലഹരി ഉപയോഗത്തിലേക്ക് നയിക്കുന്ന സാഹചര്യങ്ങളെ ചികിത്സയിലൂടെ പരിഹരിക്കുകയാണ് ഇതിന്റെ പ്രധാന ലക്ഷ്യം. ആദ്യമായി ലഹരിമരുന്ന് കൈവശം വെച്ചുകൊണ്ട് പിടിയിലാകുന്നവർക്ക് ക്രിമിനൽ കേസ് ഒഴിവാക്കി പകരം പിന്തുണയും ചികിത്സയും നൽകാൻ ഈ പദ്ധതി സഹായിക്കുമെന്ന് ഗാർഡ കമ്മീഷണർ ജസ്റ്റിൻ കെല്ലി വ്യക്തമാക്കി. ലഹരിമരുന്ന് ഉപയോഗം നിയമവിരുദ്ധമാണെന്നും അത് ആരോഗ്യത്തിന് വലിയ ഭീഷണിയാണെന്നും അദ്ദേഹം ചൂണ്ടിക്കാട്ടി. അതേസമയം, ഇത്തരം ആളുകളെ ക്രിമിനൽ നീതിന്യായ വ്യവസ്ഥയിലേക്ക് തള്ളിവിടുന്നതിന് പകരം അവരെ തിരുത്തിക്കൊണ്ടുവരാൻ സഹായിക്കുന്ന സംവിധാനം അത്യാവശ്യമാണെന്നും കമ്മീഷണർ കൂട്ടിച്ചേർത്തു.

പദ്ധതിയിൽ ഉൾപ്പെടാൻ കർശനമായ മാനദണ്ഡങ്ങളുണ്ട്. ലഹരിമരുന്നുമായി ബന്ധപ്പെട്ട് മുൻപ് ക്രിമിനൽ പശ്ചാത്തലമോ മറ്റ് കേസുകളോ ഇല്ലാത്ത, ആദ്യമായി പിടിക്കപ്പെടുന്ന മുതിർന്നവർക്ക് മാത്രമാണ് ഇതിന് അർഹതയുള്ളത്. കുറ്റം സമ്മതിച്ച് പദ്ധതിയിൽ പങ്കാളികളാകുന്നവർക്ക് HSE വഴി SAOR (Support, Ask and Assess, Offer Assistance, Refer) എന്ന പ്രത്യേക സംവിധാനത്തിന്റെ സേവനം ലഭിക്കും. കൗൺസലിംഗിലൂടെയും ആരോഗ്യ പരിശോധനകളിലൂടെയും ലഹരി വിമുക്തി നേടാൻ ഇത് വഴിതുറക്കും.

എന്നാൽ, ലഹരിമരുന്ന് കൈവശം വെക്കുന്നത് നിയമപരമാണെന്ന തെറ്റിദ്ധാരണ വേണ്ടെന്നും സർക്കാർ വ്യക്തമാക്കിയിട്ടുണ്ട്. മയക്കുമരുന്ന് വിരുദ്ധ നയത്തിൽ വരുത്തുന്ന ഒരു പ്രധാന മാറ്റമാണിതെന്ന് അധികൃതർ അറിയിച്ചു. ചെറിയ കേസുകളിൽ ഇത്തരത്തിൽ ആരോഗ്യ മേഖല വഴി പരിഹാരം കാണുന്നതിലൂടെ, ലഹരിമരുന്ന് വിൽപ്പനയും വിതരണവും നടത്തുന്ന വൻകിട ക്രിമിനൽ ശൃംഖലകളെ പിടികൂടുന്നതിൽ കൂടുതൽ ശ്രദ്ധ കേന്ദ്രീകരിക്കാൻ പോലീസിന് സാധിക്കുമെന്ന് സർക്കാർ വിലയിരുത്തുന്നു. കോടതി നടപടികളിലൂടെയല്ലാതെ ചികിത്സയിലൂടെയും കരുതലിലൂടെയും മയക്കുമരുന്ന് പ്രതിസന്ധിയെ നേരിടാനുള്ള അയർലൻഡ് സർക്കാരിന്റെ ദീർഘകാല പദ്ധതിയാണിതെന്ന് അധികൃതർ വ്യക്തമാക്കി.